Mis Divine Word Yunivesiti Josie Nicholas i winim resis bilong Mis Madang na i kisim kraun long Lavianah Leong, Mis Madang 2019.

Josie Nicholas em i gat 22 krismas na em i namba 3 yia sumatin bilong Bisnis Stadis na Menesmen long Yunivesiti bilong Divine Word. Em bilong Kairuku Distrik long Sentral Provins.

Menesing Dairekta bilong Melanesian Turist Sevis Limited, Sir Peter Barter i tok, “Dispela program bilong ol meri long resis long kamap Mis Madang we i kamap i soim gutpela na strongpela spirit bilong komyuniti long Madang.”

Em i tok i gat tupela as tingting bilong dispela program. Namba wan em long strongim ol meri na namba tu em long kamapim gen blut benk long Madang Provinsal Haus Sik.

“Mipela i laik strongim ol meri na tu helpim Madang Provinsal Haus Sik long dispela taim we kantri i nogat moni na hevi bilong Covid-19 i wok long i go bikpela,” Sir Peter Barter i tok.

Long dispela taim tu, ol i opim Madang Turis Indastri Asosiesen (MTIA) wantaim logo bilong en.

“Olgeta provins i bin mangalim Madang bipo bikos em i namba wan provins long kamapim Turisim na Kalsarel Senta. Turism Indastri long Madang i nau opim MTIA long wokbung wantaim Nesenel, Provinsal, na Distrik level na wantaim ol arapela provins tu long kamapim gutpela turist indastri bilong ol lokal na intanesenel visita wantaim taim gavman i apim ol tambu we ol i putim long COVID-19,” Sir Barter i tok.

Em i tok tenkyu long COVID-19 Kontrola David Manning long givim tok orait long ol long holim dispela program.

Rebecca Negere i raitim