OL ekseketiv bilong GeruPeng Festivol long Jiwaka i amamas long welkamim Gavana Jenerel (GG) Sir Bob Dadae long taim bilong festivol long Ogas 20-22.

Sinia protokol opisa bilong GG Mathew Ding i toksave long kam bilong Sir Bob long Julai 9 taim em i visitim Bulunts Festivol graun wantaim ol deleket.

Mista Ding i tok olsem Gavana Jenerel i amamas long stap presen long lukim namba wan taim we nupela Jiwaka provins bai i tek pat long wanpela bikpela nesenel festivol.

GeruPeng festivol siaman Philip Kapal i salim tok i go long opis bilong GG olsem GeruPeng em bai soim kalsa tru bilong Jiwaka.

"Mipela i redim olgeta samting nau long soim Jiwaka kalsa long nesenel na intanesenel komyuniti," Westen Hailens Primia bipo Philip Kapal i tok.

Poromanim Mista Ding long dispela opisal wokabaut i go long Jiwaka em Nesenel Kalsarel Komisen festivol direkta Andrew Kina.

Mista Kina i tokim ol ekseketiv olsem NCC ananit long Ministri bilong Turisim Ats na Kalsa i luksave pinis long GeruPeng na i rejisterim em pinis long nesenel kalsarel ivens kalenda.

"Dispela i minim olsem olgeta yia bai yupela i holim GeruPeng festivol long Ogas 20-22.

"NCC wantaim turism ministri i gat driman long kirapim kalsa na skulim ol yangpela bilong yumi long holim strong pasin tumbuna.

"Kalsa em aidentiti bilong yumi. God i blesim kantri bilong yumi wantaim planti gutpela na kalsa i pulap tru long kain kain kala, save na stail," Mista Kina i tok.

Hoffman Gulgarye i raitim