POT MOSBI Jeneral haus sik i stopim sampela wok bilong en nau bihain long ol i painim sampela Helt Kea Woka i kisim sik COVID-19. Haus sik i wok long mekim ol wok bilong klinim ples nau.

Ekting Dairekta bilong Medikol Sevis, Dr Kone Sob ii putim wanpela toksave i go long olgeta wokman na meri bilong haus sik long ol sevis haus sik bai givim long ol sikman.

Long Patoloji Sevis, bai ol i mekim wok bilong testim blut na blut tranfusen yet. Ol i mekim wok bilong klinim patoloji seksen long Fonde 16 Julai wantaim Nesenel Dipatmen bilong Helt (NDOH) na Wol Helt Ogenaisesen (WHO). Bai ol i mekim wok bilong sekap oltaim long dispela seksen long narapela tupela wik moa.
Long Sejikol Sevis, ol Ilektiv sejeri bai i no inap long kamap inap ol i toksave bihain. Ol imejensi sejeri tasol bai kamap long Jeneral na Spesialti sejikol operesen na long Obstetriks/Gainakoloji Imejensi Sevis.

Long ol Konsaltesen Klinik bai stat long Mande 20 Julai ol i daunim namba i kam daun long 15 manmeri tasol. Bai ol sekyuriti opisa i helpim long kontrolim ol manmeri husat i go long ol dispela konsaltesen klinik.

Ol lain i go long kisim ol dispela sevis i mas bihainim nupela nomol bilong CODIV-19. Ol i mas stap longwe long ol arapela manmeri, putim mask long pes, wasim han na bihainim rul bilong haus sik. Ol dispela sevis i karamapim Redioloji, TB Klinik, Dental, Fisioterapi, Sosel Wok, Heduru, Onkoloji, Eninetal na Jeneral Sapot Sevis.