OL pipel bilong Yangoru-Sausia Distrik i amamas long witnesim liklik seremoni bilong opim han bilong BSP benk long Yangoru stesin long dispela wik Mande.

Bikpela amamas seremoni bai i kamap long Septemba 16, 2020.

Memba bilong Yangoru-Sausia iletoret Richard Maru i tok tenkyu long BSP long i gat bilip long em na putim wanpela han bilong benk long Yangoru.

Mista Maru i tok, “Dispela bai i sevim ol pipel na ol bisnis komyuniti long distrik, na tu ol arapela i kam long ol arapela provins.

“Dispela em i wanpela sevis ol pipel i nidim tru na em i stat bilong nupela wokabaut bilong distrik bilong mipela na mipela i ken go het long stretim ol plen tu bilong bringim namba tu benk i kam long distrik.

“Long dispela rot mipela i ken givim ol pipel bilong mipela sans bilong mekim disisen long wanem benk ol I laik wok wantaim.”