MEMBA bilong Henganofi long Isten Hailans Provins, Robert Atiyafa i askim ol birua klen long Kainantu long pasim pasin birua, lusim ol samting bilong pait na kamapim bel isi.

Em i tok pasin bilong birua bai i no inap kamapim gutpela sindaun, lukim divelopmen na strongim laip.

Em i mekim dispela tok long taim em i helpim long kamapim wanpela bel isi bung namel long ol birua traib olsem Jaffa, Bazanofi 1 na Kremanto bilong Kainantu distrik long Nesenel Spot Institut long las wik.

“Olsem wanpela nesenel lidaman, mi save laik lukim gutpela sindaun em i mas i stap namel long ol lokol pipel long ol hauslain na viles komyuniti long provins,” Atiyafa i tok.

Em i tok, em wanpela i bin wok wantaim ol kaunsela bilong Jaffa, Bazanofi 1 na Kremanto LLG long bringim pis na bel isi long pipel long dispela eria.

“Mi laik lukim yupela i gat gutpela sindaun na gutpela sindaun i no inap kamap inap yupela i kamapim bel isi,” Atiyafa i tok.

“Inap em inap. Plis tingim ol meri na pikinini na pinisim pasin bilong pait.

“Taim yumi putim daun ol samting bilong pait, yumi ken wok wantaim na kamapim wok divelopmen.

Atiyafa i tok em i givim moa long K30,000 long helpim long kamapim dispela bel isi seremoni.

Em i tok dispela hevi i stap long planti yia na planti manmeri i no lukim wanpela gutpela divelopmen i kamap long eria bilong ol.

Dispela i mekim ol manmeri na pikinini i ranawe long haus lain bilong ol na stap long ol bus haus o i go long ol arapela ples.

Insait long dispela pis seremoni, ol paitman na ol viles komyuniti lidaman i bin sainim ol pepa bilong kamapim tok orait na kamapim bel isi pasin namel long ol yet insait long hauslain na viles komyuniti bilong ol.

 Sape Metta i raitim