EKTING Metropoliten Suprintenden bilong Nesenel Kepital Distrik (NCD), Christopher Tamari i singaut long ol komyuniti long 6-mail husat i stap long sori long stretim hevi bilong ol long gutpela rot na i no ken pait.

“Ol komyuniti husat i stap long sore long memba bilong yupela i lusim laip mas bihainim stretpela rot long stretim dispela hevi na i no ken kamapim pait,” Ekting Metsup Tamari i tok.

Em i mekim dispela tok bihain long ol dispela komyuniti i kisim bodi bilong wanpela saspek na i putim long rot bilong kar na singaut long ol polis long stretim ol.

Dispela i mekim ol manmeri long komyuniti i kam bung na i pait wantaim ol polis. Tasol ol polis i stopim ol na daunim dispela hevi long i kamap bikpela.

Ol i bilip olsem ol polis i bin arestim, paitim em na salim em i go long haus sik bihain long em wantaim 3-pela man i stil.

Mista Tamari i tok, ol wokman bilong Saint John Ambulance i kisim bodi bilong saspek i go long haus sik bihain long em i kisim bagarap long Fraide na em bin dai long Sarere.

Mista Tamari i amamas long ol polis opisa bilong NCD long arestim ol stilman na kamapim bel isi long ol belhat manmeri long komyuniti.

“No gat wanpela man o meri i kisim bagarap long dispela taim na nau mipela i wok long putim was long ol komyuniti long stopim ol long kamapim hevi na birua long siti,” Mista Tamari i tok.