PAPUA Niugini Sivil Rejistri nau bai wok strong long stopim pasin bilong ol yangpela manmeri krismas bilong ol i liklik yet long marit hariap.

Minista bilong Komyuniti Divelopmen, Yut na Relijen, Wake Goi i tok dispela nau bai mas kamap lo.

Em i tok tu olsem ol pikinini husat i marit na ol manmeri husat i save kisim pe long nem bliong ol manmeri i dai bai i pinis long mekim dispela pasin.

Goi i mekim dispela tok i no longtaim i go pinis taim em i tokaut long opis bilong Sivil Rejistri bai go bek na stap aninit long Ministri na Dipatmen bilong Komyuniti, Yut na Relijen.

Em i tok pasin bilong ol pikinini i marit hariap i stap longpela taim na kamap olsem kastom na kalsa bilong yumi na papamama na ol atoriti i no mekim wanpela samting long stopim.

Em i tok ol pikinini na famili bilong ol man i dai pinis i holim yet ol benk kad na ol arapela wok pepa we ol i hait na kisim pe yet aninit long nem bilong ol.

“Mipela bai stat long sekim na mekim senis na givim Sivil Rejistri ol trupela tok,” Goi i tok.

“Mipela bai sekim gen ol bet setifiket, marit setifiket na dai setifiket na save husat i bon, husat i stap na husat i dai.

 “Rejistresen bilong ol sivil pepa bai go daun long viles level we ol wod rekota na ol distrik komyuniti bai kisim rekot long wan wan manmeri insait long viles.”

Long wankain taim, Goi i tokaut long Dickson Kiragi olsem ekting Rejistra Jenerel na Sama Arua olsem ekting Deputi Rejistra Jenerel.

Ol bai inap long 3-pela mun na bihain Dipatmen i edvataisim tupela posisen long ol manmeri ken aplai.

Willie Brul i raitim