OL 16 klinik insait long tripela ilektoret long Nesenel Kepital Distrik bai kisim ol helpim i kam long US Gavman, olsem infrared temomita, skrining but, TV skrin, marasin bilong kilim indai binatang no gut na marasin bilong wasim han.

Dispela helpim i kam aninit long K12 milien helpim bilong US Gavman i kam long PNG long daunim COVID-19.

US Embeseda bilong Papua Niugini, Solomon Ailan na Vanuatu Erin McKee i go pas long givim ol dispela medikol ikwipmen long las wik Fonde long 6-Mail Klinik long Pot Mosbi.

“Gavman bilong U.S i laik helpim PNG long strongim helt sistem bilong kantri long abrusim hevi bilong COVID-19, long lukautim ol komyuniti na givim strong long helt sistem long daunim ol hevi bilong helt long bihain taim tu,” Embeseda McKee i tok.

Ekting Sif Ekseketiv Opisa (CEO) bilong Nesenel Kepital Distrik Provinsal Helt Atoriti Dokta Jerry Tanumei i stap long dispela taim na i amamas long helpim i kam long Gavman bilong US.

“Provinsal Helt Atoriti i mekim wok wantaim olgeta strong bilong en long lukautim ol pipel long COVID-19 na hevi we dispela sik i kamapim. Mipela i amamas long dispela sapot i kam long US Gavman long strongim wok bilong mipela,”Dokta Tanemei i tok.

Insait long USAID COVID-19 Rispon Projek, US gavman i wokbung wantaim PNG Gavman, ol wanwok, na ol patna bilong en long karim aut ol wokmak long strongim ol helt kea sistem long banisim, luksave na stretim hevi bilong COVID-19.     

Rebecca Negere i raitim