NESENEL Operesen Senta (NOC) long Pot Mosbi i tokaut olsem namba bilong ol konfem keis bilong COVID-19 i go antap long 19 long Mande long dispela wik na ol i bilip olsem em bai go antap moa yet.

Insait long wanpela wik tasol NOC i luksave long 8-pela positiv COVID-19 keis. Dispela infomesen i kam long kol senta 1800200 .

Namba sikis keis i bin gat kensa taim em i kisim COVID-19 olsem na em i bin dai. Em i wanpela meri long Sentral Provins na krismas bilong en i 48.

Dokta Paison Dakulala i tok,“Long olgeta hap long wol, mipela i lukim COVID-19 i bagarapim laip bilong ol sikmanmeri husat i gat bikpela sik. COVID-19 i no save kea long wanpela man, yu strongpela man, yu saveman o yu sikman em kam holim yu em holim yu nau. Olsem na dispela namba sikis COVID-19 keis husat i dai i bin gat sik kensa taim sik COVID-19 i kisim em.”

Ol dokta i tok dispela meri i dai bikos ol ogen bilong en i no inap long wok gut. Ol i tok taim em i gat sik kensa ol dispela ogen i no strong moa na taim binatang bilong COVID-19 i go insait long bodi, ol ogen i no inap long wok gut na dispela i mekim em i dai.

Helt Minista Jelta Wong i tok sore long ol famili bilong dispela meri na i singaut long ol pipel long Pot Mosbi na PNG long kisim was na stap. Em i tok, COVID-19 i stap pinis long komyuniti na i wok long muv raun.

“Ol dispela nupela keis we i kamap i bin i go i kam long ol komyuniti, sios, stua, buai maket na i bin yusim ol PMV bas. Ol i mas kisim COVID-19 long dispela ol ples na mi laik olsem ol kontek tresing tim bilong mipela i mas painimaut olsem ol dispela lain i no givim sik long narapela lain. Tasol ol manmeri i no wok long harim tok,” Minista Wong i tok.

Rebecca Negere i raitim