FINSCHAFEN distrik long Morobe i kamap namba tu bihain long Namatanai  distrik long Nu Ailan long kisim Distrik Komiti Memba bilong Nesenel Procurement Commission (NPC) bod.

Wok bilong ol em long makim gavman long baim na kisim ol guds na sevis.

Komiti i gat 2-pela eks opisio memba na 3-pela memba ol i makim.

Eks opisio memba em distrik edministreta na CEO  Glen Kiso wantaim distrik fainens menesa Koto Guina.

Tripela memba  ol i makim em Yanogan Yong, em i makim lo na jastis sekta, Wilma Wanga makim ol meri na William Mammun i makim komyuniti.

NPC ekting Siaman na Fainens Seketeri Ken Ngangan i bin go pas long seremoni  we ol i bin mekim promis long wok bung bilong long Pot Mosbi. Em i tok ol memba i no hap bilong distrik. Ol i bilong NPC.

“Bipo Central Supply na Tender Board (CSTB), District Supply na Tender Board (DSTB), na Provincial Supply na Tender Board (PSTB) i bin stap aninit long Provinsal gavman. Tasol i gat nupela rifom i  tok, yu komiti bilong NPC long Nesenel level na Bod i givim yu wok long mekim long distrik level,” Mista Ngangan  i tok.

Em i tok PNC bai lukluk long wok bilong ol. Olgeta wok we ol i mekim long distrik na provins bai PNC i mas save long en long Nesenel level.

“Bipo  i  no bin gat gutpela menesmen long ol kontrak bilong gavman. Taim akauns bilong gavman i pas nau mipela i save kisim ol klems i kam long ol kontrakta. Dispela i bin wanpela bikpela hevi long ol yia i go pinis,” Mista Ngangan i tok.

Ekseketiv opisa bilong NPC,  Simon Bole  i tok distrik komiti i gat mani mak long K2.5 milien long kisim kontrak inap long K2.5 milien tasol na aninit long K5 milien.

“I tambu long brukim ol kontrak long bungim mani mak bilong kisim kontrak. Dispela em i asua aninit long Nesenel Procurement Ekt,” Mista Bole i tok.

Mista Bole i askim tu ol narapela provins na distrik long toktok wantaim  NPC na  kisim ol komiti memba bilong ol na givim luksave long ol.

Mista Kiso i tok tenkyu long NPC bod long givim wok i go long Finchafen na i bekim askim bilong NPC long painim opis long distrik wantaim wanpela procurement opisa bai lukluk gut long ol wok long Finchafen.

Carolyne Ketsimur i raitim