KRISTEN Helt Sevis long PNG i tok tenkyu long gavman long bekim hariap singaut bilong ol tasol ol sios helt sevis i stap pas yet inap gavman i givim sampela moa mani bilong namba tu kota.

Dispela K20milien we gavman i givim em sios i yusim long baim ol wokmanmeri bilong en na bekim ol dinau bilong en long tripela mun stat long Janueri i kam inap long mun Epril. Ol i wetim nau narapela hap mani bilong mun Me i kam long Julai.

Long mun Me i kam long Julai sios helt sevis i nidim K12.7milien long baim ol wokmanmeri bilong en na narapela K1.7milien bilong operesen.

Sif Ekseketiv Opisa bilong Kristen Helt Sevis Ulch Tapia i tok “Mipela i amamas long gavman i traim hat long rausim sampela hevi bilong mani long larim helt sevis i ken go het na sevisim ol pipel.”

Em i tok tu olsem Kristen Helt Sevis i amamas long K14.5milien we i go long Kristen Helt Sevis.

“Mipela i patna longtaim tru wantaim gavman na mipela i amamas long bekim hariap bilong en,” Mista Tapia i tok.

Dispela mani ol i kisim i inapim ol helt sevis tasol. Ol sios helt trening skul i wet yet.

Tasol long wankain taim ol sios helt sevis i luksave long nid bilong trenim planti komyuniti helt woka olsem na ol tisa i givim asainmen tasol long ol sumatin long helpim ol long lainim na ol tisa i stap long haus.

Rosa Koian i raitim