USINO Bundi distrik i namba wan long Madang provins long kamapim Distrik Prokiumen Komisin (DPC) bilong en yet.

Dispela bai kontrolim mani long kamapim ol projek long distrik.

Lokal MP na vais Minista bilong Maining, Jimmy Uguro i bin stap na opim Usino Bundi DPC long distrik hetkwata long Walium i no long taim i go pinis.

Dispela seremoni i lukim tu kontrak saining bilong ol komiti memba bilong DPC i kamap long ai bilong Mejistret Nasaling Bingtau.

Mista Uguro i tokaut olsem dispela nupela Distrik Prokiumen Komisin i kisim ples bilong olpela distrik saplai na tenda bod long distrik (DSTB).

Em i tok dispela nupela DPC bai lukluk long skelim na mekim disisen long mani mak i inap tasol long K2.5 milien.

Em i tok ol projek we mani mak bilong ol i stap antap long K2.5 milien bai go long han bilong Provinsal Prokiumen Komisin (PPC) long glasim na givim tok orait.

Em i tok tu olsem Usino Bundi distrik long Madang provins em wanpela long 4-pela distrik long PNG we Gavman aninit long Fainens Dipatmen i luksave pinis na i traim long yusim nupela model bilong wok na yusim mani.

Ol arapela distrik long kantri em long Namatanai long Nu Ailan provins, Ambuntri Drekikir long Is Sepik na Finschafen long Morobe provins.

Uguro i tok gavman i luksave long ol gutpela wok divelopmen i kamap long dispela 4-pela distrik i kamap gut na gavman i traim ol nupela plen we i ken kamapim ol gutpela projek long helpim ol pipel.

Long Madang provins yet, Usino Bundi distrik i go pas wantaim Sumkar distrik long sevis deliveri i go long helpim ol rurel pipel bilong en.

Long Usino Bundi, sampela ol bikpela impekt projek we memba i statim pinis na wok i go het em nupela Usino distrik helt post, kapa faktori na tu pawa saplai long Walium i go long Usino gavman stesin na EMTV televisen telekas i go long ol rurel pipel.

Em i baim ol skul bas na trak na givim ol skul long Ramu veli na baim bot bilong polis na sapot i go long polis wantaim nupela kar na ol arapela impekt projek we i ken helpim ol rurel pipel long senisim laipstail bilong ol.

Long agri-bisnis, MP Uguro i putim mani i go wantaim Nesenel Divelopmen Benk (NDB) we ol pipel long i ken kisim dinau na mekim ol projek.

James G. Kila i raitim