Gavana bilong Nu Ailan, Sir Julius Chan i statim pinis wanpela nupela data bes sistem bilong kolektim ol infomesen bilong ol pipel bilong Nu Ailan provins insait long 142 LLG na wod.

Sir Julius i tokim olgeta man na meri long rekodim ol infomesen insait long provins. Em i tok ol i mas kolektim olgeta infomesen bilong wan wan man, meri na pikinini na apdeitim ol rekod bilong ol.

Em i askim ol tu long ol i mas mekim wok bilong ol gut.

Dispela wok bilong rekodim ol infomesen em i kamap bihain long Sir Julius i bin sainim wanpela MOU wantaim Dipatmen bilong Provinsal na Lokal Level Gavman Afes long Februari.

Ol opisa bilong Dipatmen bilong Provinsal na Lokol Gavman Afes (DPLGA) na Presiden bilong Tikana LLG Sammy Missen na Presiden bilong Murat na Kavieng Eben Kaunsel i bin stap long taim Sir Julius i opim dispela trening.

Ekting Provinsal Edministreta na Dairekta bilong Distrik na LLG Afeas Ricky Fugonto husat i go pas long dispela projek i tok dispela rekod buk projek em wanpela gutpela rot we Nu Ailan gavman i ken save long namba bilong ol pipel bilong en na bai ol i ken yusim ol risos bilong en long helpim ol pipel.

 “Em i mas kamap namba wan tingting olsem olgeta dipatmen bilong gavman long olgeta level mas wok bung na serim ol risoses bilong ol long sapotim dispela projek,” Mista Fugonto i tok.

 Gavana Chan i tok dispela ol rekod buk bai i no inap helpim Nu Ailan tasol, em bai i helpim tu ol ilektoral komisin long taim bilong ol eleksen.

James Sapan i raitim