MARAPE-Steven Gavman i wokim disisen long daunim ol hevi bilong ol pikinini husat i no gro gut.

Gavman bai kisim The Fast Track Initiative (FTI) long daunim dispela hevi.

Long Papua Niugini, klostu hap bilong olgeta pikinini i no gro gut o stant bikos ol i no kaikai gut. Em bai hat tru long ol pikinini long i go kamap nomol gen sapos gro bilong ol i stop.

Sapos wanpela pikinini long PNG i no gro gut orait em i ken pilim sik, em i no inap mekim gut long skul wok na inap kisim bikpela sik taim em i gro. Pikinini bai kisim taim, long taim em i kamap bikpela na em bai no inap mekim planti gutpela samting long laip bilong en.

Deputi Praim Minista Davis Steven i tok dispela disisen gavman i mekim i soim komitmen na lidasip bilong ol lida long olgeta sekta long apim nutrisen na daunim namba bilong ol pikinini i no gro gut.

“Dispela em i no bilong wanpela dipatmen o sekta tasol long mekim wok long daunim dispela hevi nogat. Dispela rot nau mipela i kisim em bilong olgeta dipatmen na sekta long wokbung wantaim na stretim dispela hevi. Dispela hevi i bin holim bek ol pikinini na kantri bilong yumi long luksave long strong bilong ol,” Deputi Praim Minista Steven i tok.

Long taim bebi i kamap i go inap long namba 2 krismas bilong en, em i taim bilong bebi long divelopim tingting bilong en. Long dispela taim em i gutpela taim long givim ol gutpela kaikai tasol long ol pikinini. Dispela bai helpim long givim gutpela helt long ol na ol i ken mekim gutpela samting long komyuniti.

Long bungim dispela, Deputi Prsim Minista Steven i tok, “Mipela bai apim fud sekyuriti, fiding, kea giving prektis na gutpela helt sevis na tu kamapim gutpela klinpela envaironmen.”

Rebecca Negere i raitim