OPIS bilong Bougainville Electoral Commissioner (OBEC) i redi long go het wantaim 2020 ileksen long Bogenvil.

Bogenvil Ilektoral Komisina George Manu i bin mekim dispela tok taim em i givim updeit bilong em long ileksen long bung bilong OBEC Gender Equality na Social Inclusion (GESI) polisi long Buka.

“Mipela i bin bungim sampela hevi long mani, poling taim, ilektoral rol, printing na distribusen bilong balot pepa, tasol nau mi ken tok mipela i redi,” Mista Manu i tok.

Mista Manu i tok em i kisim planti komplen long ol dispela hevi. Tasol em i tok ol bai ol i stretim dispela hevi.

“Ileksen baset em i K13.5 milien tasol mipela i bin kisim K7.5 milien tasol. Bai mipela i nidim yet K6 milien long ranim ileksen.”

Em i tok  ol dona patna i helpim ol long mekim dispela ileksen i go het yet.

Em i tok tenkyu long ol dona ejensi long sapot bilong ol.

Long wankain taim tu, ol namba wan balot pepa i kamap pinis long kantri.

“Mi amamas long tokaut olsem ol balot pepa i kamap pinis long Pot Mosbi. Na i redi long kam long Bogenvil nau,” Mista Manu i tok.

OBEC bai mekim kwaliti sek bihain long ol pepa i kamap long Bogenvil na bihain bai ol i salim i go long distrik long Bogenvil na ol narapela provins long redi long poling we bai kamap long namba 12 Ogas.

Mista Manu i tok tenkyu long Gavman bilong Australia long baim kost bilong printim na salim ol balot pepa.

Em i amamas long sapot bilong ol pipel  na gavman bilong Australia.