MINISTA bilong Polis, Bryan Kramer i tok dai bilong leit Jenelyn Kennedy i no wanpela tasol we i mas kisim jastis long wanem planti meri i bin dai long han bilong man bilong ol.

Minista Kramer i mekim dispela toktok long Sir John Guise Stadium long Nesenel Kapital Distrik las wik taim ol i bin wokim las rispek long dai bilong Jenelyn na ol narapela meri i dai pinis.

“Pastaim planti bilong ol meri i dai, i no gat komitmen na planti bilong ol dispela keis i stap yet tasol nau dispela gavman i laik wokim komitment long mekim Jenda Bes Vailens olsem namba wan wok bilong mipela,” Minista Kramer i tok.

Polis Minista i tok, “Keis bilong Jenelyn bai mipela i putim namba wan long Polis Prosekyusen, long kriminel jastis sistem na mi save Atoni Jeneral, Davis Steven bai i mekim olsem tasol em i no long kes bilong dai bilong Jenelyn tasol ol narapela meri tu.”

“Bai mipela i lukluk long senisim sampela lo we toktok i stat pinis we Praim Minista i sapotim. Husat i paitim meri bai i karim dispela hevi na man o meri i lukim domestik vailens tasol i no ripotim bai i gat lo long holim ol tu,” Polis Minista i tok.

Em i tok i gat lo i stap we sapos wanpela i kilim narapela man long kar em mas ripotim tasol sapos em i no ripot, em i brukim lo. Dispela i no wankain long domestik vailens na gavman i toktok long senisim dispela lo na husait i lukim pait i kamap na i no ripot, em i brukim lo tu.

Marape-Steven gavman bai i putim Domestik Vailens wankain olsem long lukluk long Korapsen insait long kantri.

Minista Kramer i tok, “Olgeta komyuniti i mas wok bung wantaim polis long stopim dispela pasin, ol mama na papa tu i mas skulim ol pikinini mangi bilong ol olsem paitim ol liklik meri em i rong.”

Charlpetson Koi i raitim