PAPUA NIUGINI nau i gat polisi bilong lukautim solwara bilong kantri. Dispela polisi bai opim rot bilong ol provins long nambis na kantri long kamapim lo bilong solwara.

Deputi Praim Minista na Minista bilong Jastis na Atoni Jeneral, Davies Steven i opim dispela Nesenel Osen Polisi 2020-2030 long las wik wantaim US Embeseda long PNG Erin McKee na ol arapela divelopmen patna.

Mista Steven i tok dispela polisi bilong solwara em i namba wan polisi bilong solwara insait long kantri bihain long kantri i kisim Independens long 1975. Em i tok, dispela polisi i luksave tu long ol Nesenel Gol na Dairektiv.

Mista Steven i tok klia olsem ol lain husat i stap long taim bilong opim em ol wokman bilong gavman, ol divelopmen patna, ol teseri sumatin, na ol arapela ogenainesesen bilong gavman. Em i tok, ol dispela lain em ol lain we bai go pas long mekim wok bilong dispela polisi.

“Olsem Memba bilong Palamen makim maus bilong ol komyuniti insait long ol provins long nambis, mi amamas tru long olgeta wokman bilong gavman long hatwok ol i mekim long kamapim dispela polisi,” Mista Steven i tok.

Embeseda McKee i tok solwara em i bikpela samting long laip bilong ol manmeri long ol ailan kantri olsem PNG. Em i toktok tu long olsem wanem solwara i bungim ol hevi bilong global woming na polusen.

“Yumi mas lukautim solwara. Na PNG i kisim namba wan step long lukautim solwara taim em i opim Osen Polisi 202-2013,” Embeseda McKee i tok.

“ Yumi mas lukautim solwara bilong yumi. Wanem samting i kamap long PNG bai olgeta kantri long Pasifik i pilim.”

Em i tok, long mekim dispela polisi i kamap ol komyuniti i mas kamapim wok.

 Seketeri bilong Dipatmen bilong Atoni Jeneral, Dokta Erik Kwa i tok, ol i bin kamapim dispela polisi long las yia. “Nau polisi i kamap pinis, ol gaidlain na fremwok bai helpim long kamapim lo bilong solwara o Osen,” Dokta Kwa i tok.

“Mipela i gat lo bilong maining, lo bilong forestri, tasol i no gat lo bilong solwara. Nau i gat polisi we i ken helpim mipela long lukautim solwara.”

Rebecca Negere i raitim