Polis Minista Bryan Krammer, Souten Zon Komanda, Badili Stesin Komanda na ol komyuniti lida long Wanigela i bin bung long Kone Polis Hetkota long dispela wik na i toktok pinis long wokpainimaut we bai kamap long luksave long man husat i kilim narapela man long Sande nait.

Long Sande avinun, wanpela pait i bin kamap namel long ol Wanigela na ol Tari. Dispela pait i go bikpela na ol manmeri husat i raun long Koki Maket, bas stop na ol stoa i ranawe i go i kam. Pait i go bikpela tru na i go het yet inap 9 kilok long nait.

Memba bilong Mosbi Saut, Justin Tkatchengko i tok, insait long dispela pait long 7 kilok nait long Sande, wanpela man long Tari i kisim naip na i sutim baksait het bilong wanpela man long Wanigela.

Dispela i mekim na long Mande moning ol Wanigela i mekim bikpela pait wantaim ol Tari.

Ol stoa i pas na bas stop tu i pas. Ol bas i tanim tasol long Badili na ol manmeri i yusim dispela bas stop long i go i kam.

Long wankain taim, ol stil man i kisim dispela sans na i pulim bilum na hanbek bilong ol manmeri husat i laik kalap long bas. Taim ol polis i wok long stopim pait long Koki ol yangpela man i pulim bilum bilong ol manmeri long Badili. Lo na oda hevi i bin kamap bikpela tru long Mande moning long Mosbi Saut.

Long dispela taim Mista Tkatchenko na Polis Minista Bryan Kramer i go kamap long dispela hap wantaim ol bikman bilong ol polis na ol i toktok wantaim ol pipel bilong Wanigela na stopim pait.

Na long Tunde moning, olgeta samting i go orait gen. Nogat pait. Ol manmeri i raun fri. Ol stua i op na bas stop tu i op gen.

Rebecca Negere i raitim