BIHAIN long 100 yia sevis insait long Papua Niugini sios helt sevis i pilim sotwin tru na ol i pasim ol haus sik bilong ol long Papua Niugini.

Ol Katolik Bisop bilong PNG na Solomon Ailan i bin tok long midia konprens bilong ol las wik olsem dispela em i no stret tru na ol i mas mekim dispela hatpela disisen long pasim ol sios helt sevis. “Mipela i patna bilong gavman long bringim sevis long ol pipel. Mipela i mekim wok na gavman i putim mani,” Presiden bilong Bisop Konprens Asbisop Anton Bal i tok. Katolik Helt Sevis i sanap wantaim Kristen Helt sevis na i mekim disisen bilong pasim ol haus sik. Helt na edukesen em besik sevis we ol pipel i mas kisim na em i no stret sapos ol haus sik i pas, Asbisop Anton i tok. Inap 6-pela mun nau ol sios i askim na wetim mani bilong helpim operesen na bilong baim ol wokmanmeri bilong ol haus sik. Tasol ol i no kisim wanpela gutpela bekim. Ol i askim gavman long harim dispela singaut bilong ol sios helt sevis na stretim dispela hevi hariap. Ol i tok ol sios helt sevis i nidim mani bilong operesen bilong haus sik, na gavman i mas hariap na baim ol nes na dokta bilong ol. Dispela i pusim ol sios haus sik, helt senta na sios helt woka trening institusen long pas. “Ol sios i stap long ol rurel eria na ol i bringim helt sevis i go klostu long ol pipel. Tasol, sori tru ol i mas pas na planti tausen pipel bai i pilim hevi bilong dispela,” wanpela komyuniti lida long Kundiawa i tok. Em i mekim dispela tok bihain long St Joseph Rurel Hospital long Mingende long Kundiawa i pas long las Fraide. Raihu haus sik long Aitape, Wes Sepik Provins tude i givim awenes long komyuniti long toksave pastaim long ol pipel na ol bai i pasim haus sik long tumora Fraide Julai 10.