Papua Niugini em i no seif long ol meri long stap.

Dispela em i wanpela toktok we ol sumatin meri long skul bilong Lo long Yunivesiti bilong Papua Niugini i raitim antap long wanpela bokis na i karim na wokabaut long wanpela wokabaut bilong daunim GBV we i bin kamap long las wik Fonde.

Piksa bilong dispela meri wantaim dispela toktok i go i kam long olgeta hap long sosel midia na planti toktok i wok long kamap.

Planti ol manmeri long sosel midia i no wanbel long dispela piksa na ol i tok PNG em i gutpela kantri na kainkain toktok na piksa i go i kam long sosel midia i bagarapim nem bilong PNG.

Long narapela sait, ol sampela lain long sosel midia i tok, dispela tok em i tru na bilong wanem ol manmeri i no wanbel? Sampela meri olsem Nell Gewa Lewa long Twitter i tok, “ mi no pilim seif long haus bilong mi. Mi no pilim seif long bas stop. Mi no pilim seif long maket, long stua, na long wokples bilong mi. Mi no pilim seif long nait na long de taim tu. Mi no pilim save.”

Tasol, long Facebook wanpela man Elijah Palme i tok, “Dispela meri husat i tok PNG i no seif em i save stap long Pot Mosbi na wanem em i pilim long Pot Mosbi em i mekim dispela tok. Tasol ol arapela ples long PNG em i seif na i gutpela. Em i noken mekim kain toktok na bagarapim nem bilong PNG nating.”