KONTROLA bilong Nesenel Pandemik Respons na Polis Komisina David Manning i givim lukaut long ol manmeri husat i save kamapim ol giaman tok na nius.

Manning mekim dispela tok bihain long ol toktok i kamap long Facebook we i tok namba bilong ol manmeri husat i gat coronavirus (COVID-19) i wok long kamap bikpela long Pot Mosbi.

Em i tok em i no gutpela long kamapim ol giaman tok long ol manmeri.

Em i tok kain pasin i no gutpela na manmeri we i save mekim kain pasin i brukim Cyber Crime (Intanet – Komiupta) Lo na bai kisim mekimsave taim Polis i painim ol.

Em i tok las ripot bilong PNG i gat COVID-19 em long 25 Jun we wanpela ami opisa long long Pot Mosbi i gat dispela sik na dispela i mekim namba i go antap long 11 long ol manmeri husat i kisim dispela sik long kantri.

No gat wanpela dai i kamap long dispela ol lain na olgeta i orait gen.

Las tupela keis em Nesenel Kontrol Senta (NCC) i wok long wet yet long fainel mak sapos tupela bai kamap orait o nogat.

Mista Manning i tok las tupela ripot i kamap bihainim ol ripot i kam long Helt Dipatmen, PNG Difens Fos, Australia Difens Fos, St John Ambulance na Wol Helt Oganaisesen (WHO).

Em i tok sapos i gat wok painim long ol nupela COVID-19 keis, NCC bai tokaut long dispela.

“Mi askim ol manmeri long kisim ol trupela ripot long ol lain husat i pas tru long dispela wok taim ol i laik serim ol infomesen na i no long ol ausait lain,” Manning i tok.

“Hevi bilong COVID-19 i stap yet wantaim het tok ‘Nupela Nomol’ na manmeri i mas bihainim sampela nupela wei bilong stap long abrusim sik COVID-19.

“Husat manmeri i pilim sik na i kus i mas stap long haus tasol na stap longwe long ol arapela na ripot hariap long helt imejensi namba em 1800 200 long kisim helpim.”