MEMBA bilong Bogia, Robert Naguri i joinim nupela Liberal Pati na lusim Nesenel Alaiens pati long las wik.

Em i tok Nesenel Ailans i no sapotim em long toktok strong long gavman long givim moa luksave na kamapim wok bilong helpim Manam Ailan pipel na olsem em i lusim pati.

Em i tok stat long taim gavman i tok long muvim ol i pipel long ol kea senta long Bogia i go long Andurum, bik ples Bogia, no gat wanpela wok i kamap na ol pipel i stap yet long ol kea senta.

Mista Naguri i wanpela faunding memba bilong Liberal pati we Sir John Pundari, Siaman bilong Palamentari Pablik Akauns Komiti na Memba bilong Kompiam Ambum, Enga i go pas olsem palamentari lida.

Narapela ko-faunda bilong pati em Minista bilong Boda Sekyuriti na Imaigresen na Memba bilong Dei long Westen Hailans, Westley Nukundj.

Naguri i tokaut klia olsem em i bruk lusim NA bikos pati no sapotim em long toktok long hevi bilong Manam Ailan long palamen.

Em i tok klia olsem ol pipel i stap yet long ol kea senta long Potsdam, Bom, Asuramba long Bogia na Mangem (Madang distrik).

Em i tok hevi bilong Manam Ailan pipel i stap moa long 15 yia na nogat wanpela wok i kamap long helpim ol.

James G. Kila i raitim