Komisina bilong Polis na Kontrola David Manning i givim oda long wanpela wokpainim long kamap long ol polis i lukluk long hevi bilong Jenelyn Kennedy olsem wanem long tupela krismas i go pinis i kam inap taim em i dai.

Mista Manning i tok, ripot i soim olsem man bilong Jenelyn, Bhosip Kaiwi i bin abyusim Jenelyn long moa long 2-pela krismas.

“Ol atoriti olsem polis i mekim wanem long lukautim Jenelyn? Bilong wanem na ol polis i no bin i go insait na helpim Jenelyn insait long dispela bagarap rilesensip? Ol famili memba i bin stap long wanem hap taim Jenelyn i kisim bagarap long faivpela de bipo long em i dai?

“Dispela em ol askim we mipela i mas askim na painim bekim. Sistem bilong mipela i wik, insait long polis, insait long lo, insait long welfea na long kot. Mipela i mas sekim, luksave na senisim o rausim ol wiknes insait long sistem na larim ol meri i stap gut na i nogat birua i bungim ol,” Mista Manning i tok.

Em i mekim ol dispela tok bihain long Pot Mosbi Famili na Seksual Vailens Yunit (FSVU) i givim ripot bilong ol long wanem samting i kamap long Jenelyn tripela mun bipo long em i dai.

FSVU i ripot olsem, namba wan taim Jenelyn i bin i go lukim ol, em long opis bilong ol long taun o Konedobu long Epril 20 long dispela yia. Ol memba bilong FSVU i laik putim em long wanpela seif haus tasol em i laik i go long haus bilong wanpela pren bilong en long Touguba Hill, Pot Mosbi. Ol memba bilong FSVU i kisim em i go lusim em long haus bilong pren bilong en.

Long 02^nd Me, 2020, ol memba bilong FSVU i go sevim Jenelyn long Tougoba Hill na i kisim em i go long Femili PNG. Femili PNG em i wanpela Non Gavman Ogenaisesen we i save lukautim ol lain husat i kisim bagarap long famili na seksual vailens.

Long 12^th Me, Bhosip Kaiwi i kisim Interim Proteksen Oda long wanpela keis opisa long Boroko. Long 13^th Me, Jenelyn i lusim safe haus em i stap long en. Na long 15^th Me, ol i tok em i karim wanpela leta i kam long rausim dispela keis bilong en. Tasol keis opisa i tok, ol i no inap long rausim keis na keis bai go het yet. Long 18^th Me, Jenelyn na wanpela meri i karim dispela leta i go long dairekta bilong FSVU long rausim dispela keis. Tasol dispela tu i no kamap. Ol i tokim em olsem keis bilong en bai go het na ol i bai arestim na sasim man bilong en Bhosip.

Long 26^th Me, keis opisa i ringim Bhosip tasol Bhosip i no kisim fon kol. Tasol Bhosip i tokim loya bilong en na loya i ringim keis opisa. Keis opisa i askim loya long kisim Bhosip i go long stesin na bekim sampela askim tasol loya i no bin karim Bhosip i go long stesin inap Jenelyn i dai na Bhosip i go long stesin.

Mista Manning i tok,“Mi tingting planti sapos mipela ol polis i mekim inap long lukautim Jenelyn o nogat. O sapos lo bilong mipela em i strong inap long karamapim dispela kain keis. Bilong wanem Jenelyn i lusim Seif Haus? Bilong wanem ol mun i abrus bipo long yumi arestim Bhosip?”

Komisina Manning i tok, bihain long ol wokpainimaut i kamap, em bai singautim wanpela miting na toktok long ol stekholda long strongim lo.

Rebecca Negere i raitim