POLIS Komisina David Manning i laik kamapim gen na apim standet bilong polis.

Em i laik apim standet bilong polis i go antap long mak bilong ol situesen bilong nau na tu mekim ol polis i kamap lain bilong kamapim gutpela senis insait long kantri.

Em i tok em i laik pablik i mas luksave long en olsem em i komisina bilong ol polismanmeri.

“Mi laik kamap olsem Komisina bilong ol polismanmeri na helpim na lukluk long wan wan polismanmeri olsem ol i man na tu lukluk long ol olsem ol i memba bilong Konstabulari. Mi laik kamapim planti trening na kepesiti bilding bilong ol polis na tu stretim na developim ol bilding bilong ol sevis bilong polis.

“Bikpela samting bilong mipela em ol pipel. Mi bai invest i go bek long ol wokfos. Trenim ol na apim save bilong ol humen risos bilong mipela long sampela yia. Dispela em i bikpela wok tasol mipela i mas bringim dispela ogenaisen i kam bek long rot na muvim em i go long narapela mak,” Komisina Manning i tok.

Em i tok em i laik wok i go het long lukim gutpela profesenel polis sevis i kamap we i ken wokbung wantaim komyuniti long strongim lo na oda. Em i laik apim mak bilong mekim wokpainaimaut, luksave long wait kola kraim na mekim save long ol man nogut.

“Mi laik kamapim wanpela bikpela profesenel na akauntabol polis sevis we mipela olgeta bai amamas long en,” Mista Manning i tok.

Ol sampela samting we em i tingting long mekim taim em i stap olsem Polis Komisina em: apim mak bilong koman na kontrol na disaplin, givim save na trenim ol polisman gen, strongim sistem bilong ol komiti, luksave na amamsim ol gutpela wok bilong ol polis. Stretim ol infrastraksa bilong ol polis olsem ol stesin na bareks. Apim mak bilong ol tuls na bringim ol tuls bilong ol polis i kam. Na statim wanpela hom-onasip skim bilong ol polis opisa.

Na long kantri, Mista Manning i laik apim standet bilong jastis sistem bilong ol lain kisim bagarap long famili na domestic vailens. Lukluk long soseri o keis bilong posin na sanguma na stopim ol dispela hevi long kamap. Wokbung wantaim Judisiari long ol pipel i mas bihainim ol oda i kam long kot. Na apim mak bilong wokpainimaut bilong ol polis.

Rebecca Negere i raitim