INTANESENEL Revenue Komisin (IRC) i tok nogat long Jenda Beis Vailens (GBV) na i holim strong jenda ikwaliti insait long wokples.

Long Fonde las wik, taim kantri i kolim dispela de blek Fonde na mekim kain kain awenes long daunim GBV, IRC i holim wanpela liklik bung long opis bilong ol long tingting na toktok long ol nogut samting we i ken kamap long laip sapos i no gat helpim long daunim GBV.

Sam Koim, Komisina bilong IRC i tok, “Mi laik bung wantaim ol pipel bilong Papua Niugini na tok nogat long pasin bilong paitim man na meri.”

Em i tok insait long opis long IRC, ol i luksave long hevi bilong GBV insait long famili olsem na ol i gat wanpela desk insait long opis we i save helpim ol wokmanmeri husat i bungim hevi bilong GBV na i nidim helpim na kaunseling.

Long dispela taim, Mista Koim i tokaut tu olsem, IRC em i namba wan ogenaisesen bilong gavman we i gat 49 pesen bilong ol woklain em ol meri na 50 pesen bilong ol wokmanmeri i stap long menesemen posisen em ol meri tu.

“Mipela i no inap amamasim pasin bilong bagarapim wanpela man o meri insait long opis bilong IRC. IRC i kisim pinis Jenda Ikwaliti na Sosel Inklusen (GESI) Polisi. Mipela olgeta i gat hevi long haus na dispela i save mekim na sampela taim mipela i no save mekim gut wok long opis,” IRC Komisina Koim i tok.

Insait long dispela liklik bung, ol wokmanmeri long IRC i lukim, harim na lainim ol lo we i stap pinis long mama lo long daunim GBV. Ol i lainim tu long wanem ol i ken mekim long daunim GBV na wanem hap na olsem wanem bai ol i kisim helpim taim ol i bungim hevi bilong GBV.

Siaman bilong dispela bung Paul Tad i tok, “Tingim sapos ol meri i kam long wok olgeta de wantaim GBV long haus. Wok bai no inap kamap gut.

“Mipela i mas no ken stap isi. Tasol mipela i mas tokaut o ripotim vailens taim mipela i lukim.”

Rebecca Negere i raitim