LAS wik taim piksa bilong yangpela meri Jenelyn I bin raun long Facebook na long ol niuspepa na televisen piksa bilong yangpela man Samuel J. Pumai I raun long Facebook.

Planti I singaut long “jastis”. Ol I tok ol I laikim jastis.

Wanpela meri husat I no laik tokaut long nem bilong em I tok, “Yangpela man Samuel tu I bin lusim laip bilong em long vailens las yia. Em I bin lusim laip bilong em taim gelpren bilong em I sutim em long naip. Olsem na yumi mas singaut long jastis long olgeta.”

Samuel em I yangpela man husat I bin pinis long yunivesiti stadi na statim laip bilong em olsem wanpela ikonomist long Treserei Dipatmen long Mosbi.

Ol I tok gelpren bilong Samuel Lindsay Takiabu I no stap long kalabus na I ranawe I go hait long Australia.

Las wik planti i laikim jastis long Jenelyn tasol planti moa i singaut long stopim vailens insait long kantri.