LAS wik Mande long Milen Be Provins wanpela meri i dai nating taim 5-pela yangpela man i saspektim em olsem em i sanguma meri na ol i kilim em.

Dispela meri nem bilong em Freda Taupuam na em i Presiden bilong Pumani Angliken Mothers Union.

Freda i bin ranawe wantaim man bilong em na 5-pela pikinini na hait long maunten tasol ol 5-pela yangpela man i painim ol na katim em long wan mita busnaip na kilim em long ai bilong man bilong en.

Ol ripot i kam long Alotau i tok dispela hevi i stat long 1993 yet i kam inap nau.

Long 1993 papa bilong Freda i bin dai long wankain hevi tasol. Na bihain long 2013 tupela lain bilong Freda tu i dai bikos sampela pipel long komyuniti i ting ol tu i sanguma.

Ripot i tok ol lain husat i go pas long kilim ol man o meri ol i saspek long ol i mekim wok sanguma  i tok ol i mekim long klinim soseri o sanguma long famili. Ol i kolim dispela pasin bilong klinim ples ‘wan mita’.

Stat long 1993 na kam inap nau, 26 indai i kamap pinis long hevi bilong saspek long sanguma o soseri long ples Pumani na ol ples klostu insait long Maka Aka LLG  long Milen Be Provins. Namel long ol dispela ol i kilim wanpela em i gat 15 krismas tasol.

Dispela wik brata bilong Freda i putim ripot long polis long Alotau. Insait long Pumani ples planti prêt i stap long tokaut long husat ol lain i wok long mekim dispela pasin bilong kilim nating ol pipel.

Ol lida i tokaut tu olsem ol i no inap mekim wanpela samting inap ol i kisim gutpela tok long polis na tu sapos i gat mani long helpim long painim ol lain i mekim dispela birua.

Tasol ol i bilip ol inap long daunim dispela hevi sapos i gat ol wok kamap olsem wok bilong stretim lo na oda, strongim wok bilong sios na kirapim ol liklik wok bisnis.

Freda na man bilong en tupela strongpela wokmanmeri bilong Angliken sios long komyuniti bilong ol. Em i bin stap wantaim pret long planti yia inap ol birua i kilim em las wik.