OLPELA rijonal memba bilong Madang na biknem turis indastri bisnisman long PNG, Sir Peter Barter i tok amamas na givim luksave bilong em i long wanpela lokal atis bilong Madang provins Robert Banasi wantaim grup bilong em Madang  Arts Maniacs (MAMS).

Sir Peter i tok Banasi wantaim grup bilong en MAMS i mekim moa pablik awenes long promotim ol sefti toksave o awenes i go aut long pipel bilong Madang.

Wok bilong MAMS i stap nau long planti pablik ples insait long Madang taun long promotim helt na sefti awenes long sik nogut coronavirus (COVID-19).

Sir Peter Barter i mekim dispela tok long las wik long wanpela miting bilong Madang Semba ov Komes na Indastri (MCCI) Madang Risot Hotel we ol bisnis haus na ol arapela stekholda i bin kamap long kibung na toktok long wanem wok i kamap long COVID-19 Stet ov Imejensi (SOE) long provins.

Sir Peter i tok MAMS grup i droim na peintim ol piksa na putim long pablik i bringim gutpela helt na sefti tok.

Em i tok kain ol piksa ol lain MAMS i mekim i no kost bikpela mani tasol skul toktok i go aut long pablik em bikpela samting.

“Ol toktok i go daun long mekim klia tingting bilong ol pipel long lukautim helt na sefti bilong ol manmeri i bikpela samting,” Sir Peter i tok.

Long las wik Wantok Niuspepa i bin stap long taim stret taim MAMS grup i mekim gutpela disain long kapa banis bilong Tusbab Sekenderi Skul long Madang taun.

Ol i statim long mekim long droim na peintim ol kala piksa i makim ol frut na kala bilong ol frut na wanem samting ol dispela frut i ken mekim long helpim bodi bilong ol manmeri.

Dispela nupela kapa banis long skul em i stap long maus rot bilong Nabasa Strit long rot i go daun olsem long Divain Wod Yunivesiti (DWU) na Gavstoa na PNG Maritaim Koles.

Dispela banis em edministresen bilong Tusbab Sekenderi skul i bin givim wok kontrak long sampela lain long wokim.

James G. Kila i raitim