OPIS bilong Katolik Bisop Konprens (CBC) long Papua Niugini na Solomon Ailan i askim gavman long strongim wok bilong daunim hevi bilong vailens.

Pater Giorgio Licini i tok gavman i mas givim gutpela sapot long lukim manmeri i kisim gutpela skul, helt na sosel sevis olsem sindaun bilong ol i ken gutpela.

Em i mekim dispela tok long wanpela pas em i salim i go long edita bilong ol midia long dispela wik long taim bikpela nius bilong wanpela meri i dai long han bilong man bilong en long Pot Mosbi bihainim ol pasin nogut man i mekim long meri.

“Insait long hevi bilong coronavirus yumi i bungim, wanpela taim gen harim pasin nogut bilong vailens,” Pater Giorgio i tok.

“Sindaun i nogut tru long taim pasin nogut i kamap long ol meri na pikinini.

“Famili vailens i bagarapim sol bilong bodi. Dispela i pasim laik na kea pasin we i mas i stap long famili na sosaiti.

“I no gat wanpela wei bilong toktok taim hevi i kamap long ol lain husat i no gat rot long difenim ol yet.

“Em i bikpela sori taim vailens i kamap insait long famili.

Pater Giorgio i tok hevi i save kamap taim papamama i no soim laik na gutpela skul long ol pikinini.

Em i tok gutpela sosaiti i save kamap bihainim laip bilong gutpela famili.

“Wantaim no gat dedikektet papamama, ol pikinini i no inap long kamap gut, no gat laik pasin na no gat gutpela skul.

“Dispela i save kamapim ol yangpela we ol i no inap long kontrolim tingting bilong ol na i kamap wantaim pasin nogut.’