BIKNEM Nesenel Aidentifikesen Kad (NID) opis nau bai go aninit long Nesenel Statistikal Opis, Praim Minista James Marape i tok.

Em i tok inap long K200 milien gavman i bin givim long strongim wok bilong NID tasol nogat wanpela gutpela wok i kamap na olsem opis nau bai go aninit long Nesenel Statistikal Opis (NSO).

Em i mekim dispela tok long Palamen kibung i no longtaim i go pinis taim em i bekim askim bilong Memba bilong Yagoru Sausia, Richard Maru sapos gavman i givim gutpela sapot long NID opis.

Mista Maru i tok NID opis i kamap long lukim gutpela wok divelopmen i kamap wantaim gutpela ol arapela wok olsem jeneral ileksen.

Moa yet, em i tok dispela bai helpim tu long save husat i stap na husat i no stap.

Aninit long Midium Tem Divelomen Plen 3 long Nesenel Plening na Monitering Dipatmen we i tok gavman bai yusim ilektronik sistem long holim 2022 Jeneral Ileksen.

Tasol inap long nau i no gat wanpela gutpela sapot i go long NID opis na long lukim 2022 jeneral ileksen i kamap fri, fea na i no gat vailens.

Em i tok taim em i bin stap Minista bilong Nesenel Plening, em i bin go wantaim wanpela tim long sekim ilektoral wok bilong India na wei em i wok na i askim India long helpim PNG long dispela wok.

Mista Marape i tok em i save long wok bilong NID na wok bilong dispela opis i bikpela samting.

Tasol em i tok gavman bilong em bai senisim ol wok long dispela taim bikos no gat wok i kamap maski opis i bin kisim K200 milien.

Em i tok i gat wok bilong 2020 Nesenel Sensus we i laikim K200 milien tasol mipela i no inap givim narapela K200 milien long opis we i lusim nating wanpela K200 milien na nau i askim long narapela gen.

 “I gat asua long dispela opis na gavman bilong mi bai klinim na stretim dispela opis,” Marape i tok.

“Mipela bai stretim pastaim NSO wok long distrik na provinsal level na bihain mipela bai toktok long NID program.

“Dispela i ken lukim mipela i kamapim gutpela NID wok.

“Mi bai yusim K200 milien long ol rot ausait long Pot Mosbi we i givim sevis long planti manmeri moa long mi givim mani long wanpela opis we i gat paul pasin i stap.”

Mista Marape i tok em i luksave Maru long gutpela wok i bin kamap taim Maru i bin Minista bilong Nesenel Plening long O’Neill Abel gavman.

Paul Zuvani i raitim