Minista bilong Rilijen, Yut na Komyuniti Developmen na Memba bilong Jimi, Wake Goi i laik strongim ken sivil rejistresen long Papua Niugini.

“Mi bai mekim bikpela wok painimaut na klinap insait long dispela opis bilong Sivil Rejistri pastaim bipo long mi stat long mekim wok na rejista olgeta bet setifiket, marit setifiket, na det setifiket na ol arapela samting.

“Dispela opis i bin bungim planti hevi na slip i stap longpela taim olsem na mipela bai muv go insait long stretim na helpim ol manmeri, ol Nesenel Senses tim na tu Ilektoral Komisin wantaim ol infomesen bilong ol manmeri long kantri,” Goi i tok.

Praim Minista James Marape i askim Dipatmen bilong Rilijen, Yut na Komyuniti Developmen long lukautim opis bilong Sivil Rejistri long Disemba 2019, tasol em i tok Nesenel Aidentiti (NID) bai stap aninit long Dipatmen bilong Nesenel Plenning.

“Mipela i bin askim Solisita Jeneral long sampela legal tingting na em i tokim mipela olsem aninit long lo, NID na Sivil Rejistri bai kam aninit long dipatmen bilong mi. Tasol mipela i rispektim disisen bilong Praim Minista long givim NID i go long Nesenel Plening,”Wake Goi i tok.

Em i tok, laikim na nid bilong ol legal dokumen long aidentiti bilong wan wan man na senis i kamap long sivil stetus i kamap bikpela tru. Na tu taim aidentiti menesmen sistem i kam insait em i bringim planti hevi long opis.

Minista Goi i tok, em bai strongim gen opis bilong Sivil Rejistri insait long Dipatmen bilong en, lukautim Nesenel Sivil na Aidentiti Rejistresen (NID) sistem, strongim wok bilong rejista na givim ol legal dokumen, lukautim lo bilong ol printa na niuspepa, kamapim distrik na Mobail rejistresen, mekim humen risos odit, givim menesmen na faines ripot bilong wan wan yia, apim straksa bilong ogenaisesen, strongim sivil na aidentiti rejistri opis insait long distrik, wokbung wantaim Ilektoral Komisin na Nesenel Stetistikal Opis long givim toktok bilong ol manmeri na lukluk long rejista ol nupela bebi.

Rebecca Negere i raitim