MINISTA o Polis Komisina i no gat wanpela pawa long kontrolim ol polis opisa insait long Polis Intenel Afeas opis, Minista bilong Polis, Bryan Kramer i tok.

Em i tok dispela i mekim hat long wok bilong Minista na Komisina long givim daireksen long wok bilong ol intenel afeas opis.

Em i mekim dispela tok long bekim askim bilong Sentral Gavana Robert Agarobe na Memba bilong Kairuku Hiri, Peter Isoaimo long Palamen kibung i no long taim i go pinis.

Tupela Memba i tok polis i bin mekim nabaut long ol polis rot blok long ol manmeri bilong ol long Agevairu (Hisiu) na Porebada.

Em i tok em i kisim tok pinis long Asisten Komisina bilong Polis long Nesenel Kapital Distrik na Sentral Polis Komanda, Anthony Wagambie Junia na polis i wok long mekim wok painim long hevi i kamap long Porebada maket.

“Inap Minista i tokim palamen sapos polis long wanpela distrik o provins i mas go mekim wok long narapela provins?”  Isoaimo i askim.

“Mipela i save bai i mas gat tupela rot blok tasol long Sentral Provins, wanpela long Laloki na narapela long Agevairu, we ol i lukim ol pipel long Sentral i kam long Nesenel Kapital Distrik na Galp i kam long Sentral na NCD.

“Olsem wanem na i gat planti polis rot blok long kain kain hap na polis i bagarapim ol manmeri.”

Kramer i tok aninit long lo sapos i gat spesel operesen orait polis long wanpela provins i ken go long narapela polis na mekim wok tasol sapos nogat, polis husat i brukim dispela lo bai kisim mekimsave.

Em i tok em i harim ol stori long polis i bagarapim ol manmeri tasol nau yet wanpela man i kisim bagarap na i givim ripot long polis long bihainim na mekim wok painim.

“I gat Intenel Afeas long polis tasol long sampela as ol i pasim dispela opis long mekim gut wok bilong em,” Kramer i tok.

“Mi kisim tok pinis na mi tokim Komisina long strongim dispela opis tasol mipela i kisim pas long Ombudsmen Komisin long mi na Komisina o Dipatmen i no ken senisim ol opisa i stap long dispela opis.

“Olsem na wok bilong mipela i no kamap hariap olsem mipela i laikim long em.”

Kramer i tok aninit long Polis EKt long Seksen 196 na Sab Seksen 92 i tok long kamap na operesen bilong Polis Intenel Afeas Opis.

Tasol dispela i no inap kamap bikos Ombudsmen Komisin long sampela as i raitim pas long ol long ol i no mas senisim ol opisa is tap long dispela opis.

Kramer i tok i gat lo pinis long 2018, Seksen 446, long manmeri i no ken salim, baim na kaikai buai na spet long pablik ples.

Em i tok sapos ol i brukim lo ol bai baim kot long K10,000 o nogat ol bai kalabus long 3-pela yia.

Ol i ken salim, baim na kaikai buai long haus bilong ol tasol.

Paul Zuvani i raitim