GAVMAN i mas givim bikpela tingting long kamapim ol rot we ol kes krop i stap, Minista bilong Egrikalsa na Laipstok John Simon i tok.

Em i tok i gutpela gavman i tok long kamapim ol rot long kontektim Papua Niugini tasol long wankain taim em i mas skelim wanem ol rot em i mas mekim pas.

Em i mekim dispela tok long bekim askim bilong Memba bilong Midel Ramu Johnny Alonki long Palamen kibung long Tunde sapos gavman i gat Freit Suriti (Surety) Sistem long helpim ol lokal fama long go long maket.

Alonki i tok distrik bilong en i gat bikpela namba bilong kakao na kopi tasol nogat gutpela rot long karim dispela ol kes krop long go long maket.

“Memba, distrik bilong yu i wanpela distrik we i no gat wanpela gutpela rot i stap long ol manmeri i ken go long maket,” Simon i tok.

 “Mi laik tok stret olsem long 2020 Baset, i no gat sabsidi fan long helpim ol fama.

“Pastaim long 2018 na 2019 Baset i bin gat kain fanding i stap tasol long 2020 Baset i nogat.

Mista Simon i tok pastaim long dispela sampela fama i bin go long opis bilong en na toktok long dispela hevi na em i toktok wantaim Minista bilong Nesenel Plening Sam Basil pinis long dispela.

Em i tok sapos gavman i kamap wantaim wanpela saplimentari baset orait Minista i mas tingim dispela hevi na makim sampela mani long baset long dispela stretim dispela hevi.

Simon i toksave tu long Minista bilong Woks (Michael Nali) olsem taim em i tok long konektim PNG em i mas tingim ol distrik we ol i gat bikpela namba bilong kes krop na we bikpela namba bilong ol manmeri i stap.

Em i tok gavman oltaim i tok long sot long mani na sapos em i gat bikpela tingting long dispela hevi orait em i mas kamapim kain rot olsem namba wan tingting bilong gavman.