WOMEN Micro Bank Limited (WMBL) i tok tenkyu long memba bilong Wewak Kevin Isufa na Wewak  District Development Authority (WDDA) long givim K1 milien sek mani bilong divelopim MSME long Wewak distrik.

Em bilong helpim ol lokal pipel long gat liklik mani long mekim ol liklik bisnis bilong ol.

Dispela i bin kamap bihain long agrimen bilong WMB na WDD taim tupela mekim memorandum ov Agrimen bilong Medium Small Macro Enterprise (MSME) bilong ol meri long Wewak distrik.

WMBL nau bai stat long givim sapot long ol liklik bisnis ektiviti bilong ol meri long Wewak.

Cynthia Kwamillon husat i makim WMB i tok tenkyu long Mista Isifu na DDA long bilip long WMBL long menesim dispela mani.

Em i tok moa olsem ol meri tasol bai i ken kisim dinau.  Ol man husat i gat intres bai ken joinim tasol ol meri olsem susa, anti, mama o meri bilong ol bai go pas long akaon ya. Na long kisim dinau, ol kastoma i mas gat liklik bisnis ektiviti na i mas gat sapot i kam long famili.

Em i tok ol lain husat  i save dinau na bekim hariap bai gat spesel grup bilong ol yet.

WMB bai wok wantaim ol stekholda na patna olsem, Women in Business Faundesen, AOG PNG Church, Human Develoment Institute, MSME Council na Wewak Market Mama long mekim  dispela program i kamap moa gut.

Ms Kwamillon i tok WMBL em i gat laisens long givim fainensel  long PNG na i lukluk long sapotim ol meri wantaim dispela tok “SAPOTIM MERI KIRAPIM BISNIS KIRAPIM KANTRI”.

“WMB bilip olsem ol meri i gat pawa long kirapim ikonomi bilong kantri,” Ms Kwamillon i tok.

Carolyne Ketsimur i raitim