GAVMAN i gat K54 milien dinau mani long ol viles kot mejistret, ol pis opisa na ol klak, Minista bilong Jastis na Atoni Jeneral Davies Steven i tok.

Em i tok gavman nau yet i nogat mani long baim ol.

Em i mekim dispela tok long bekim askim bilong Memba bilong Bogia, Robert Naguri sapos long Palamen kibung long Tunde gavman bai onaim komitmen bilong en long baim ol viles kot.

Mista Naguri i tok Steven long las yia Ogas Palamen Kibung i bin tok long baim ol viles kot mejistret na ol pis opisa tasol inap nau nogat wanpela mani i go long ol.

“Mi laik save gavman bai givim luksave long sevis dispela ol opisa i mekim na kompensetim ol long wok bilong ol,” em i tok.

Mista Steven i tok nau yet i nogat mani bilong baim ol.

Em i tok i tru gavman i bin traim long kamapim wantaim alokesen long baim dispela l oopisa tasol bikos long hevi bilong mani, gavman i no inap long baim olgeta viles kot opisa.

Em i tok i gat olsem 18,480 viles kot opisa i stap long kantri.

Em i tok stat long 1995 gavman i bin givim wok bilong baim ol viles kot opisa i go bek long ol provins.

“Mi laik tok stret olsem bikos long hevi bilong mani, mipela i nogat mani long baim ol opisa nau,” Steven i tok.

“Taim mi toktok wantaim lida, mi bin toktok long em long bringim bek kain wok i kam bek long nesenel gavman.

“Tasol namel long dispela taim, bikos long dinau mani mipela i gat yet long baim, mipela i no traim long lukluk long putim ol viles kot long pe rol sistem.”

Mista Steven i tok maski long hevi bilong sot bilong mani, Marape Steven gavman i makim K10 milien long 2020 Mani Plen.

Tasol dispela mani i no inap long baim olgeta opisa na olsem gavman i holim yet dispela mani.

Em i tok bikpela tingting nau i bilong bringim bek dispela wok i go aninit long nesenel gavman long baim ol opisa.