DOKTA Umadevi Ambihaipahar o olgeta lain long Papua Niugini i save kolim em Dokta Ambi i holim wanpela bung bilong toktok long mental helt o helt bilong tingitng namel long COVID-19.

Rebecca Negere i raitim

Dispela bung i bin kamap long Katolik Bisop Konprens na ol sumatin, ol papamama, ol lain husat i save lotu na ol lain i stap nating tu i stap insait long harim Dokta Ambi.

Dokta Ambi em i namba wan saikiatris meri o dokta meri bilong tingting long PNG.

Dokta Ambi em i namba wan meri bilong givim tingting long Helt Ministri bilong PNG na long 1999 yet i kam antap em i bin i go pas long ol helt sevis insait long PNG. Long dispela taim em i kamapim Tredisinel Marasin Polisi 2007, Nesenel Alkahol Polisi na Stended Tritmen Menual bilong Mental Helt na tu em i bin go pas long kamapim Mental Helt Ekt 2017.

Em i bin kamapim namba wan haus sik bilong ol pikinini na ol yangpela long Pot Mosbi. Em i memba bilong Pasifik Ailan Mental Helt Netwok na Pasifik Drag na Alkahol Risets Netwok.

Long 2011, Kwin Elizabeth i luksave long gutpela wok bilong en long kantri na em i apointim Dokta Ambi olsem Opisa bilong Oda bilong British Empire.

Dokta Ambi i toktok yet na Wantok Niuspepa i go long printing.Lukim dispela niuspepa gen neks wik na ritim stori bilong mental helt long PNG.