WOK bilong givim sapot long wok bilong sik coronavirus (COVID-19) em i go het long Goroka long Isten Hailans provins.

Sape Metta i raitim

Na wanpela bikpela holsel na ritel kampani long Goroka, SENG DA Treding kampani em i wanpela kampani long givim sapot bilong ol kaikai samting inap long mak bilong K10,000 i go long Isten Hailans Provinsal Helt Atoriti (EHPHA) long Trinde long las wik.

Menesing Dairekta Hong en Yu long taim bilong presentesen bilong dispela ol kaikai i tok kampani bilong em i amamas long givim sapot i go bek long ol pipel bilong Goroka na Isten Hailans long dispela taim bilong sik COVID-19, long wanem ol manmeri na pikinini i save baim ol kaikai samting long kampani.

“Olsem na long dispela taim nogut we sik coronavirus tu i kamap long kantri na yupela ol menesmen, opisa na ol heltwoka bilong EHPHA wantaim ol polis opisa i wok long karimaut bikpela wok tru, insait long dispela operesen bilong daunim sik COVID-19,” Yu i tok.

“Mipela tu i laik helpim yupela long dispela pait agensim dispela sik. Long dispela as mipela tu i mas pilaim pat bilong mipela long givim sapot, maski sapos em i liklik o bikpela i go bek long ol pipel,” Yu i tok.

Sif Eksekutiv Opisa bilong EHPHA Dokta Joseph Apa husat i bin kamap wantaim ol menesmen tim bilong em long kisim dispela ol kaikai samting i tok amamas long SENG DA kampani long kamap wantaim dispela sapot.

“SENG DA i bin i stap longpela taim liklik na ranim bisnis long Goroka.

Na mi amamas long lukim olsem kampani i ken luksave na kamap wantaim dispela kain sapot long helpim ol long dispela taim bilong hevi bilong sik coronavirus,” Dokta Apa i tok.

Em i tok long dispela taim bilong COVID-19 ol laikim long wok patnasip wantaim ol praivet sekta long strongim wok operesen bilong sik COVID-19 long provins.”

Dokta Apa i tok dispela ol kaikai samting EHPHA bai givim i go aut long ol lain husat i wok long ol mausrot na ol arapela lain husat i awenes wok long 8-pela distrik long provins.