OL yia wan na yia 2 sumatin bilong Don Bosco Teknolojikol Institut (DBTI) long Boroko wantaim ol wokman meri bilong DBTI i bung laswik long luksave na tingim Wol Environmen De.

Ol yia 3 na yia 4 bilong DBTI i sindaun long semesta 1 eksem bilong ol i stap taim ol junia bilong ol i sindaun insait long wanpela sotpela awenes taim we tupela klap long skul i kamapim. Dispela tupela klap em Earth & Environment na Media Education Seminar.

Long dispela taim, planti toktok we i kamap i toktok long hevi bilong enviromen long wol na i bringim tingting bilong ol yut i kam olsem nau em i taim bilong givim bek gen long enviromen.

Gabriel Kila, wanpela patisipen bilong Media Education Seminar i toktok long olsem wanem ol i ken yusim olgeta kainkain midia long salim tok bilong lukautim Envairomen.

Bihain long ol toktok i kamap, ol i lukim wanpela vidio. Dispela vidio i soim olsem i gat bikpela nid we olgeta manmeri i mas tingting strong long klaimet senis na i mas mekim ol samting we ol inap long mekim long sevim Planet Earth.

Residen Kaunsila bilong DBTI, Ruby Matane i strongim ol yut long i go bek gen long enviromen na lukautim environmen wankain olsem em i save lukautim ol yumi ol pipel.

Yia 2 sumatin Karen Limbe i tok, “Em i bikpela samting long kain awenes bilong enviromen i kamap long lukluk na harim bilong ol yangpela yut. Ol bai inap long bringim senis insait long komyuniti bilong ol. Dispela kain awenes bai kirapim bel bilong ol long senisim komyuniti.

“Olsem na yumi olgeta i ken wokbung wantaim na kamapim senis insait long sosaiti na dispela bai senisim na seivim enviromen bikos senis i stat wantaim mipela ol yut.”

Wanpela gutpela samting i kamap long dispela taim em olsem ol yangpela yet i go pas long mekim dispela awenes long ol wanskul bilong ol yet na tu i go pas long toktok na tingting.