NESENEL Kepital Distrik (NCD) Polis i arestim na sasim Liutenent Murray Oa bilong PNG Difens Fos wantaim wanpela kaun bilong kamapim bikpela bagarap long bodi aninit long Seksen 319 bilong PNG Kriminol Kod Ekt.

Rebecca Negere i raitim

NCD Metropolitan Suprintenden Perou N’Dranou i tok, ol Militari Polis i kisim Oa, krismas bilong en i 33 bilong ples Waima long Kairuku, Sentral Provins, i go insait long Boroko Polis Stesin long Sande bihain long meri bilong en Debbie Kaore i putim wanpela fomol komplen.

Boroko Famili Seksual Vailens Yunit i arestim Oa na sasim na lokim em long Boroko sel long Sande Jun 7.

Polis i arestim Oa bihain long wanpela vidio i raun long intanet long sosel midia i soim Oa i paitim meri bilong en no gut tru wantaim het bilong en na hatpela ain bilong ainim kolos.

Mista N’Dranou i tok tenkyu long ol Militari Polis long wok klostu wantaim RPNGC long bringim Oa i go long Boroko Polis Stesin.

Em i tok Oa em i yet i kamapim dispela hevi na i no militari olsem na ol manmeri i no ken bagarapim ol ami na militari nating. Em yet bai go na sanap long kot na difendim em yet.

Debbie Kaore krismas bilong en i 30, em i kik boksa na ragbi pilaia husat i save makim PNG na pilai long wol. Em i bin winim gol long 2015 na em na Oa i gat wanpela tupela mun bebi. Em i bilong ples Rapuri long Talasea, West Nu Briten Provins. Em i mekim komplen long Polis bihain long em i kisim bikpela bagarap long han bilong Oa.

Polis Minista Bryan Kramer i tok, em i amamas long gutpela wok bilong Difens Fos na Polis long stretim dispela hevi kwiktaim.