29 sitisen bilong Papua Niugini we i bin stap long Jayapura long Indonesia i kam bek gen long Papua Niugini long Skouv/Wutung Intanesenel Boda long las wik.

Long dispela 29 sitisen, 25 em ol i bin stap long kalabus bilong Jayapura bikos ol i bin brukim lo na krosim boda, 4-pela em ol man nating husat i kisim taim long Jayapura stap na wanpela em bebi.

Ol Indonesien Atoriti na PNG Konsul Jeneral long Jayapura, Kenol Geoffrey Wiri i kisim ol i kam long Batas Boda Post na i givim ol i go long han bilong PNG Wes Sepik COVID-19 tim long Boda.

Kwiktaim, Institut bilong Medikol Risets (IMR) na Provinsal Helt Atoriti i mekim COVID-19 testing long ol dispela lain long boda.

Ol dispela 29 sitisen i nau stap insait long 14 de kwarentin long Golden Medallion Hotel long Vanimo. Gavman i baim pinis kost bilong stap bilong ol. Ol i bai go bek long femili na komyuniti bilong ol bihain long kwarentin.

Tetin (13) moa sitisen bilong PNG i stap long Jayapura bai kam bek tu em ol sumatin. Ol i stap long olgeta hap bilong Indonesia olsem na bihain gavman bilong PNG i bungim ol bai ol i bringim ol i kam.

Mista John Yamin, Ekting Deputi Seketeri Operesen, Dipatmen bilong Foren Afeas i tok, “Mipela i amamas tru long wok bilong gavman long lukluk long hevi bilong COVID-19 na tu Sandaun Provinsal Gavman na boda ejensi long bringim ol PNG sitisen i kam bek long kantri. Mipela i lukluk fowed long kisim ol sampela moa sitisen husat i kisim bagarap long Indonesia i kam bek long PNG.