OL Sif long Sentral Bogenvil i tok Presiden John Momis i mas stap yet long Atonomus Bogenvil Gavman (ABG).

Bogenvil i nidim John Momis yet long ol toktok bilong ol namel long tupela gavman long wokabaut bilong Bogenvil i go long Independens.

Siaman bipo bilong Sentral Bogenvil Kaunsil bilong ol Sif John Dona i tok em i laikim Mr Momis long pinisim wok bilong em long toktok wantaim PNG gavman.

Ol pipel i makim em olsem mausman bilong ol na Mista Momis i mas stap yet.

Mista Dona i tok Momis i ken ran yet long sia bilong Rijonal Memba we Joe Lera i lusim pinis long ran long sia bilong ABG Presiden long dispela ABG ileksen.

Em i tok moa olsem ol yangpela i lukluk long posisen bilong pawa tasol sif i mas stap na pinisim ol wok bilong independens bilong Bogenvil.

Kot i tok no gat long Momis long ran gen long ileksen bilong ABG tasol ol pipel i no tok no gat long em, Mista Dona i tok.