GAVMAN long wok bilong kisim dinau mani is tap aninit yet long Fiskal Responsibiliti Ekt (FRE), Tresera Ian Ling-Stuckey i tok.

Paul Zuvani i raitim

Em i tok gavman i no aipas na kisim dinau mani long kain kain hap.

Em i mekim dispela tok long bekim askim bilong pastaim Praim Minista na Memba bilong Ialibu-Pangia, Peter O’Neill long Palamen kibung long Tunde sapos gavman i bin brukim FRE.

Aninit long FRE mak bilong dinau mani bilong kantri i mas stap daunbilo long K30 bilien.

“Mi laik askim tu Memba sapos wanem plen em i bin gat long strongim ikonomi taim em i stap Praim Minista,” Stuckey i tok

“Lukluk bilong Memba bilong Ialibu olsem dispela gavman bai mas stretim olgeta hevi bilong kantri long namba wan 12 mun bilong en.

“Tasol sori tumas kantri i lusim K2.222 bilien revenu long 2020 mani plen bilong en bikos long hevi bilong COVID-19.

Stuckey i tok gavman nau bai laik kisim K1.26 bilien dinau mani long Intanesenel Monitari Fan (IMF).

Em i tok IMF i no gat kain kain toktok moa olsem em i bin save mekim tasol nau i no gat olsem na gavman i laik kisim dinau mani long em.

Em i tok gavman i no gat tingting long daunim velu bilong kina. Em i tok kain toktok i no gutpela long tok long pablik bikos dispela i no gutpela nius long wok bisnis na inap long givim pret long ol investa husat i laik kam long kantri.

Em i tok bikos long hevi bilong COVID-19 IMF nau i tok ikonomi bilong kantri nau bai pundaun long negetiv (-) 9 pesen bihain long lukluk bilong gavman long gros domestik prodak (GDP) long kantri bai gro long 2 pesen.

Em i tok gavman nau bai gat K4.86 bilien defisit long K14 bilien 2020 Baset.