People’s National Congress Party (PNC) i wanbel long disisen bilong Praim Minista James Marape long muv i go long oposisen sait bilong Palamen.

Rebecca Negere i raitim

Bipo Praim Minista, Peter O’Neil, lida bilong PNC na Memba bilong Ialibu-Pangia i tok, em i bung wantaim ol memba bilong en long PNC na ol i wanbel long tingting bilong Praim Minista James Marape.

“PNC i bung tude na i wanbel long disisen bilong Marape long raus long gavman bilong en na i go stap long oposisen,” Peter O’Neil i tok.

Praim Minista Marape i tok em i mekim dispela disisen bikos ol PNC memba i save go egensim em na gavman bilong en tumas maski ol i save sindaun long sia bilong gavman long Palamen.

“Ol memba bilong PNC i stap insait long Gavman, tasol ol i save toktok olsem ol Oposisen long gavman bilong mi. Olsem na em i moa gutpela long olgeta yet i mas i go sindaun long Oposisen na tok pait egensim Gavman long laik bilong ol olsem lida bilong ol i wok long mekim i stap,” Praim Minista Marape i tok.

Lida bilong PNC Mista O’Neil i tok Marape i lus tingting olsem PNC i givim namba long em long floa bilong Palamen long kamapim Gavman bihain long olgeta lida bilong ol pati i tok no gat long en.

Em i tok, Marape i giamanim PNC taim em i laik kamapim Gavman na joinim Crown Coalition.

“Em i no stap stret long komitmen bilong en olsem na em i no inap helpim kantri.

“PNC i muv i go pinis long Oposisen, olsem na mipela bai sanap strong na egeinsim wik lidasip bilong Marape.

“Em i wokmak bilong mipela long kisim ol bagarap bilong kantri aninit long lidasip bilong en kam ples klia,” Mista O’Neil i tok.

Mista O’Neil i tok, PNC bai wok wantaim olgeta wanwok long Palamen long apim trupela polisi long rausim kantri long han bilong Praim Minista Marape.