Moalong 100 yut long Lae i mekim wanpela bikpela klinaton long Lae Siti long las Sarere na i singaut long gavman long no ken larim maining kampani Wafi-Golpu long tromoi pipia bilong main i go insait long solwara bilong ol long Lae.

Rosa Koian i raitim

Ol yut i tok ol i mekim dispela klinaton long toktok long klinpela envairomen. Ol i lukim olsem dispela Deep Sea Tailings Placement (DSTP) sistem we Wafi-Golpu i laik yusim long tromoi pipia bilong en bai i bagarapim solwara bilong ol.

Ol i tok Huon Galp solwara i mas no ken kamap olsem Basamuk long Madang.

Narapela tok i singaut long Praim Minista James Marape long lukluk bek long wanpela ripot bilong Constitution Law Reform Commission (CLRC). Dispela ripot i toktok long tambu long tromoi pipia bilong maining I go insait long wara na Solwara.

Rekomendesen 5 insait long dispela ripot namba 6 bilong CLRC long 2015 i tok senis i mas kamap long Mining Act 2000 long tok no gat tru long Riverine Tailings Disposal (RTD) rot bilong rausim pipia long ol maining wok i kamap bihain.

Ol Lae Yut i singaut tu long Morobe Gavana Ginson Saonu na olgeta memba bilong palamen long ol nambis ples long toktok long dispela ripot bilong CLRC long tambuim na stopim pasin bilong tromoi ol pipia bilong maining i go insait long wara na solwara.

Ol yangpela i apil tu long sanap wantaim ol na tok nogat long Wafi Golpu long tromoi pipia bilong en long Huon Gulf solwara.

Het Bisop bilong Evangelical Lutheran Church PNG (ELC PNG) Rev Dr Bisop Jack Urame husat i stap wantaim ol yangpela long stat bilong klinaton itok amamas long ol yangpela bilong Lae. Em i tok gutpela tru ol yangpela i sanap long lukautim envairomen bilong ol.

Bisop Urame i singaut tu long ol lida long harim dispela singaut bilong ol yangpela.

Dispela singaut i kam long dispela taim bilong luksave na lukautim solwara bilong yumi.

Dispela em i namba tri klinaton ol Luteran Yut i go pas long en na ol arapela yut long Lae i bin joinim.