Gavman bai stat long pasim wok bilong salim raun loging o diwai ol i no katim i go aut long 2025.

Minista bilong Diwai, Solan Mirisim i tokaut long dispela long Palamen kibung long Tunde taim em i bekim askim bilong Gavana bilong Noten, Gary Juffa long as sampela timba kampani i wok yet long Collingwood Bay.

Mista Juffa i askim sapos Mirisim i save olsem maski em i bin kisim toksave olsem Noten Provinsal Gavman i pasim ol timba kampani long operet tasol ol timba kampani i go yet long katim diwai na salim i go aut.

Em i askim tu sapos Minista i save olsem sampela ol kampani i brukim lo na mekim timba operesen moa long Sastenibel Egrikalsa Bisnis Lis (SABL) we ol i kisim long mekim wok.

Gavman i pasim wok bilong SABL long 2015 long no ken kamap na Gavana Jufa i laik save sapos Ripot bilong SABL i redi na Minista i mas tokaut long dispela.

Mista Mirisim i tok i tru gavman i bin toktok long pasim wok bilong salim raun loging tasol dispela i no kamap lo yet na olsem ol kampani i go het yet long salim ol diwai ol i katim.

Long 2009 olsem taim Memba bilong Vanimo Green i stap Minista bilong Fores em i bin tok long pasim kain wok bisnis na i askim long ol kampani i mas salim tasol pinis prodak o diwai ol i wokim long fektori na bihain salim dispela ol palang o timba.

Gavman i bin tok long kamapim lo long 2019 tasol dispela i no kamap.

“Mi mas tok klia olsem i nogat wanpela lo i kamap yet long pasim ol kampani i katim ol diwai na salim,” Mirisim i tok.

“Taim i gat lo, dispela bai pasim ol kampani long no ken salim raun loging.

“Dispela lo nau bai kamap long 2025 we ol kampani i bai daunim mak bilong raun loging ol i salim inap long ol i pinis olgeta long salim kain timba olsem.”

Mirisim i tok em i wok wantaim ol opisa bilong Fores Atoriti long kamap wantaim dispela lo.

Planti Poin ov Oda i kam long Memba bilong Ambunti Drekikir Johnson Wapunai, Is Sepik Gavana Allan Bird na Juffa yet long pasim kain bekim bilong Minista.

Ol i tok em wok bilong Minista long lukim olsem ol opisa bilong en i mas mekim wok na lukim dispela lo i kamap na long go long ol ples we ol timba operesen i kamap na sekim wok bilong ol kampani olsem ol i mekim wok olsem ol i tok long mekim.

Long wan wan yia Forestri sekta i save kamapim olsem K742.2 milien o 9.2 pesen long gros dometik prodak (GDP) bilong kantri.

Mista Mirisim i tok em bai painimaut stap bilong SABL Ripot na bai tokaut long dispela ol palamen long bihain kibung.

PINIS.