Wanpela awenes program bilong ol man long Soseri Akusesen Riletet Vailens (SARV) i bin kamap long Monokam autstesin long Kompiam-Ambum Distrik long Enga Provins long 10 i go14 Epril, 2023.

LONG mun Epril i bin gat wanpela awenes program bilong ol man long Soseri Akusesen Riletet Vailens (SARV) i bin kamap long Monokam autstesin long Kompiam-Ambum Distrik long Enga Provins. Dispela wan wik awenes i bin stat kamap long 10-14 Epril.

Dispela woksop i bin kamap long stretim tok bihain long ol lain i holim 9-pela meri long ples Lakolam na givim bikpela pen na bagarap long ol bodi bilong ol. Sampela lain long ples i bin sutim tok long ol dispela meri i wokim sanguma pasin na kilim indai bisnisman, Jacob Luke.

Ol lida bilong komyuniti long Monokam i laik mekim dispela awenes na ol i wokbung wantaim ol sios long komyuniti, opis bilong Caritas long Wabag na Bisop Arnold Orowae na Bisop Justin Ain Soongie bilong Katolik sios long Wabag.

Moa long 300 pipel na ol yut, mama, pikinini na ol lapun long ol ples long Ambum Valley i bin stap insait long dispela awenes.

Ol i bin toktok long ol hevi SARV i save kamapim. Na ol i toktok tu long ol arapela hevi insait long komyuniti olsem traibel pait, pasin bilong dring spak na smokim mariwna, reip, pasin bilong stil na ol arapela hevi i wok long bagarapim komyuniti.

Long pinis bilong dispela 5-pela de komyuniti awenes, ol man husat i bin stap insait long dispela SARV pasin wantaim ol arapela lain i gat hevi long drag na pait nabaut i bin mekim promis long lusim ol dispela pasin nogut. Bihain long dispela, Bisop Arnold bilong Wabaga Daisis i selebretim misa na pasim dispela bung.

Ol i bin kamautim 77 mariwana diwai na givim ol hom-med gan na kroba (crowbar) em ol i bin yusim long dispela SARV egensim ol 9-pela meri, i go long han bilong Sinia Inspekta Richard Koki, komanda bilong Enga Rurel Polis.

Bisop Justin i tok amamas long ol dispela man long kamap ples klia na tok sori na promis long senisim laip bilong ol. Em i tok tenkyu tu long ol lida bilong ples long kamapim dispela program we ol yangpela man i ken stat long senisim laip bilong ol.

Bisop Arnold i tok olsem em i no isi long kisim toksave olsem sampela lain i kukim ol meri. Em i tokim ol pipel long stopim dispela pasin na luksave olsem wan wan manmeri i spesel na no i gat wanpela man i gat rait long givim pen na kilim narapela man o meri.

Lida bilong SARV Program long Caritas Wabag, Dickson Tanda, i tok dispela edvokesi program i kirapim tingting bilong ol man na yut long mekim awenes long ol giaman bilip na ol drag nogut insait long komyuniti bilong ol.

Caritas Wabag bai kamapim wankain awenes long Kandep bihain long Kompiam-Ambum.

PINIS.