Independens i min olsem manmeri mas sanap long strong bilong wan wan na i no inap askim wanpela long wanpela samting.

Hoffman Gulgarye i raitim

Wanpela yangpela fama long Jiwaka i soim tru ol arapela long komyuniti olsem em i save gut tru long as tru bilong livim  indipenden laip. Michael Parik bilong Sekeing Epri klen long Kudjip lokal level gavman insait long Anglimp-Saut Wagi ilektoret i statim ol planti projekt long graun bilong em we i bringim planti benefit long em na famili bilong em. Mama i karim Michael long Septemba 16, 1975 na dispela yia em i selebretim 46 krismas, wankain olsem Independens eneveseri bilong kantri. “Ol i givim nem Michael long mi bihian long faunda bilong nesen leit Gran Sif Sir Michael Somare.

“Mi yet save pilim spesol bikos mi serim wanpela bon dei wantaim kantri. “Olsem wanpela independens man, mi mas stap independen laip na sanap long tupela lek bilong mi yet,” Parik i tokim Wantok Niuspepa. Stori bilong yangpela man i olsem bipo em i bin smukim spak brus na dring stim bia na bosim Kudjip maket na wokim planti biket pasin. Tasol long yia 2013 long Septemba 16, taim em i gat 38 krismas, Parik i givim laip bilong em long God na i kisim famili bilong em i go long graun bilong em long Tolsi.

Parik i bin wok olsem wanpela klina long Kudjip Nasarin haus sik toilet planti yia na tu i bin volentia long klinim Kudjip maket. Em i bin baptais long Nasarin sios na long dispela yia em i wokim sios bilong em yet na kolim Tolsi Nasarin sios. Wanpela strongpela bilip bilong Parik em i olsem em i gat bikpela bilip long graun.

“Long stap indipenden laip long ples, mipela ol ples manmeri mas go bek long graun. “Papa God i bin blesim pinis graun na putim mani, pik na kaikai i stap pinis long hap.

“Yumi mas senisim tingting na holim graun na graun bai i lukautim yumi,” Parik i tokaut long hau bai gutpela sindaun i kamap. Wanpela taim em wantaim ol famili bilong em i digim pispon i go na ol i painim ol olpela dikin tuls. Parik i wokim wanpela atifekt haus na putim ol tuls wantaim ston akis, spia, banara, na ol kainkain kaving i go insait. Dispela i givim em tingting long divelopim wanpela turisim senta.

Em i wokim wanpela hap bilong glasim pisin o ‘bird watching’ eria, stretim wanpela wara klap (‘waterfall’) na lukautim ol enimal olsem dok, pik, ples kakaruk, na kaskas. Parik wantaim meri bilong em Martina i gat faivpela bailojikel pikinini na foapela adopted pikinini. Ol i gat bikpela painapol gaten we ol i save salim long Kudjip na Banz maket. Olgeta dispela pis projek, egrikalsa ektiviti, na turism projekt i kam ananit long wanpela kampani em rijisterim olsem Tolsi Cultural Heritage Reviving Centre wantaim Investment Promotion Authority (IPA).

“Mi bin pinisim gret 6 na nogat save tasol ol dispela samting em gutpela tingting i kam long papa God. “Wari bilong mi i olsem, mi laikim lokal gavman wantaim ol gavman ogenaisesen mas sapotim wok bilong mi.

“Mi laik mekim dispela samting i gro kamap bikpela na provaidim employmen opotuniti long ol yangpela long mekim sampela mani na lusim ol pasin nogut.

“Olgeta manmeri i bin bon wantaim potensel long kamap saksesful tasol yumi yet save les planti,” Parik i surukim tok. Em i laik tokim ol yangpela manmeri sanap nating long rot sait maket long Kudjip, Minj, Banz, Kumbal, Nondugl, Kimil, Avi na Kindeng long lusim dispela hap na go bek long graun na holim speit na busnaif.

Bel hevi bilong Parik i olsem: “Long 2013 i kam inap nau, mi no bin kisim wanpela halivim long ol lokal lida olsem gavana na memba.

“Mi bin salim toksave long ol planti taim tasol nogat wanpela bilong ol i kam na lukim ol proposel bilong mi.

“Joe Kuli (MP bilong Anglimp-Saut Wagi) tasol i bin kam long lonsin blo senta bilong mi tasol fans em promosim em no givim yet.

“Dispela i no mekim mi wari. Mi bai kontinu long wok mi mekim wantaim ol famili bilong mi,” Parik i tok. Ol turis long Amerika, Yurop, Australia na Nu Silan i bin visitim pinis eria bilong Parik na ol i bin wanbel stret.

Tolsi Cultural Heritage Reviving Centre i stap arere long Kudjip tea, sampela 3 kilomita long maunten sait. Manmeri laik go visitim eria i ken sekim Michael Parik long pes buk o ringim em long Digicel phone namba 7476 5042 o WhatsApp long dispela namba.

PINIS.