EMBESEDA bilong Saina long Papua Niugini, Zeng Fanhui i tok em i amamas long lukim Pot Mosbi Jeneral Haus Sik i redi long kamap namba wan ples long PNG long givim sinopharm veksin i kam long Saina long ol lain husat i laik kisim banis sut long banisim ol yet long COVID-19.

“Ol klinikal stadi i soim olsem sinapharm veksin i strong na i seif na World Health Organization i givim tok orait long mipela i ken yusim long taim nogut.

“Tupela wik i go pinis, moa long 2,000 pipel bilong Saina i stap long kantri i kisim sinopharm banis sut na nogat wanpela i bungim hevi o kisim bagarap.

“Saina i givim moa long 500 milien veksin bilong COVID-19 i go long moa long 100 kantri pinis. Na mipela i amamas olsem ol lain long Papua Niugini bai kisim veksin bilong Saina tu we bai banisim ol pipel na helt bilong kantri,” Embeseda Fanhui i tok.

Minista bilong Forest na Memba bilong Namatanai, Walter Schaunbelt, husat i stap long dispela taim long lukim ol i opim sinopharm veksin i kamap namba wan PNG man long kisim dispela sinopharm veksin.

Em i tok Nesenel Reguletori Atoriti i givim tok orait long 4-pela veksin we WHO i tok orait long en long ol pipel long kantri i ken kisim. Ol dispela veksin em AstraZenecca, Pfizer, Johnson and Johnson na Sinopharm.

“Mi kisim dispela sinopharm veksin long soim ol manmeri long kantri olsem em i laik bilong yu long makim wanem veksin yu laik kisim long banisim yu yet long COVID-19,” Minista Schaunbelt i tok.

Embeseda Fanhui i tok, binatang bilong COVID-19 i wok long kamap nupela na i go i kam long olgeta hap. Binatang delta bilong COVID-19 tu i bringim moa nupela salens na nogut. Olsem na em i tok pasin bilong wokbung wantaim na daunim dispela pandemik mas kamap namba wan. Na kisim banis sut em i bikpela samting long kontrolim na winim dispela pandemik.

Rebecca Negere i raitim