LONG 2012 mi bin go raun lukluk long wanpela setelmen long Pot Mosbi bihain long wanpela eviksen i
bin kamap.

Insait long dispela setelmen ol naispela simen plua wantaim ol seramik tael i stap yet.
Ol pipel i tokim mi olsem tupela pailot i bin slip long dispela haus.
Long hapsait ol plua bilong narapela haus i stap. Dispela haus ol i tok em wanpela loya meri i bin stap
long en.
Ol pipel i tok moa olsem ol nes na tisa tu i stap insait long dispela setelmen.
Bikpela askim em bilong wanem na dispela ol lain i mas stap long setelmen?
Alison (em i no laik givim narapela nem bilong em) wanpela meri Isten Hailans em wanpela tisa meri
long wanpela skul long Pot Mosbi.
Em i tok em i mas stap long setelmen long wanem em i ken baim liklik rent na slip long wanpela rum
wantaim famili bilong em.
Em i tok ol sampela tisa i save slip long skul na dispela em i no gutpela. Skul em i ples bilong ol sumatin
na mipela tisa i go givim sevis bilong edukesen tasol. Em i no haus bilong slip.
Kost bilong rent em i antap tru. Alison i baim K500 long rent long wanpela potnait na em i gat liklik mani
tasol i stap long lukautim em na famili bilong em long tupela wik.
Lukluk long ol kost bilong rent long Pot Mosbi long go stap long wanpela haus i gat tripela rum bilong
slip, ples bilong kuk i stap na toilet na rum bilong waswas i stap em K1,000 long wan wan wik. Em i olsem
K2,000 long wanpela potnait.
Alison i tok olsem tisa mi no save kisim antap long K2,000 long potnait. Pe bilong mi em i aninit long
K1,000. Olsem na mi mas stap long setelmen.
“Mi laik stap long setelmen long Mosbi long wanem tupela pikinini bilong mi i ken kisim gutpela
edukesen. Long ples ol i save pait planti na skul em i hat,” Alison i tok.
Em i orait long stap long setelmen tasol nau i gat hevi bilong no gat gutpela wara saplai, no gat gutpela
toilet na ples bilong waswas na pawa. Na mipela i stap paspas na kainkain pasin i stap tu.

Sans bilong mekim mani
Long narapela sait ol famili husat i stap pinis long setelmen i lukim tu sans bilong mekim mani taim planti
arapela famili i painim haus bilong slip.
Ol i yusim hap spes baksait long haus bilong ol na sanapim haus na putim long rent. Long dispela rot
insait long wan wan blok long ol setelmen i gat moa long tupela haus i sanap na liklik blok i save pas tru
long ol pipel.
I no longtaim i go pinis planti toktok i go i kam long Saraga setelmen long Pot Mosbi bai i kamap wanpela
sabeb bilong Pot Mosbi. Dispela em i wanpela setelmen bilong long taim yet.
Minista bilong Graun, John Rosso tu i tokaut pinis long em bai i lukluk long mekim ol haus we ol pipel i
ken rentim o baim long gutpela prais.

Rosa Koian i raitim
Ol kampani i helpim ol wokmanmeri bilong ol long i gat haus bilong ol yet, taim ol i helpim ol long seivim
liklik mani olgeta potnait inap ol i redi long baim o bildim haus.
Tasol diman bilong skul na wok i save pulim planti pipel i kam long Pot Mosbi na em i save pulap.
Tasol olsem wanem na kost bilong haus em i antap tru?
Planti yangpela krismas bilong ol i abrusim 30, na ol i statim famili pinis i stap yet long haus bilong
papamama.
Cletus Waris em wanpela dispela ol yangpela. Em i stap long haus bilong papamama wantaim famili
bilong em.
Em i pilim hat long go long ples bilong em long Morobe long wanem i no bikpela long ples.
Waris i askim sapos gavman i ken lukluk long helpim em na ol arapela yangpela long sindaun long siti
long haus bilong ol yet.
Em i wok na wankain olsem Alison, potnait pe bilong em i aninit long K1,000.