Ol STEM progrem em impoten long ol sumatin i lainim long praimeri na sekenderi skul yet bipo long ol i kamap long ol yunivesiti na koles.

Ezekiel Lawrence i raitim

WANPELA gred 12 sumatin bilong Passam Nesenel Skul bilong Ekselens, Watep Pim i bilip strong olsem, ‘Science, Technology, Engineering, na Mathematics’ o STEM program bai nap long senisim kantri long bihain taim.

Dispela STEM program i bin kamap las yia aninit long wokbung bilong Australia gavman na PNG gavman (PNGAusPartnership).

PNG STEM i kamapim dispela program long 12-pela sekenderi skul long kantri, we 6-pela bilong ol dispela skul em ol nesenel skul bilong ekselens.

Pot Mosbi skul bilong ekselens em i las skul long ol STEM sumatin bilong ol i mekim eksam bilong dispela program long stat bilong dispela mun.

Pim i kisim awot olsem namba wan sumatin long dispela program, we moa long 60 sumatin i stadi long en namba wan taim long kantri.

Ol samting we ol dispela sumatin i lainim long STEM program i wankain liklik olsem ol sampela saiens kos we ol yunivesiti o koles i save lainim.

Pim i tok dispela i givim ol tingting long samting we ol sumatin i save lainim long koles na yunivesiti, olsem na em bai isi tru long ol taim ol i go long narapela mak long skul bilong ol.

“Mi amamas tru long stap insait long dispela program olsem wanpela bilong ol namba wan sumatin.

“Samting mipela i lainim long las tupela yia bai helpim mipela tru taim mipela i lusim skul na go aut,” em i tok.

Sampela ol sumatin bilong PNG i bin skul aninit long dispela program bipo, tasol ol i save go skul long en long ol arapela kantri.

Bihain long ol i bin traim dispela program las yia, Pim i laikim olsem gavman i mas lukluk long putim dispela program long ol praimeri skul tu.

48 tisa i bin greduet dispela yia long setifiket bilong STEM edukesen we Queensland University bilong Technology i bin kamapim.

Wanpela tisa bilong Aiyura skul bilong ekselens, Flora Piu Agoniso husat i bin greduet wantaim ol dispela tisa, i amamas long lainim ol samting we i ken mekim senis long ol lesen bilong em.

“Mi luksave nau long ol samting we mi mas lainim ol ‘Chemistry’ sumatin bilong mi.

“Taim ol i go aut, ol bai save pinis long wanem samting ol i mas mekim,” em i tok.

Long dispela wik, 37 STEM tisa na ol lida meri long ol skul i go long Australia long lainim ol samting aninit long STEM program we ol i ken karimaut dispela program i go moa yet long ol skul long kantri.

PINIS.